Prezidentimiz taʼkidlaganlaridek, birorta ham yurtdoshimizni, birorta ham oilani kuchli toʼfon qarshisida yolgʼiz qoldirmaymiz. Shu munosabat bilan bugun ertalab Buxoro davlat universiteti rektori Obidjon Xamidov tashabbusi bilan universitet jamoasi tomonidan tayyorlangan, Olot va Qorakoʼl ahliga kundalik ehtiyoj uchun kerak boʼladigan oziq-ovqat mahsulotlari, sanitariya-gigiyena vositalari ortilgan karvon manzilga yetib bordi.Universitet jamoasi tomonidan tabiiy ofatdan zarar koʼrgan Olot tumanidagi Boʼribek-Chandir qishlogʼi aholisiga poliz mahsulotlari, non mahsulotlari, shakar, un, gurunch, makaron, tuxum, shirinliklar, kiyim-kechaklar, yengil koʼrpa toʼshaklar va boshqa birlamchi ehtiyojlarni qondirish uchun mo'ljallangan mahsulotlar yetkazib berildi.Kunning ikkinchi yarmida universitetdagi 150 nafardan ortiq tashabbuskor professor-oʼqituvchilar, yoshlar va duradgor-ustalar guruhi 640 nafar xonadon yashab kelayotgan Bo'ribek-Chandir qishlogʼidagi tabiiy ofatdan zarar koʼrgan oilalarga tashrif buyurishib, u yerdagi holatlarni oʼrganib chiqdilar. Tinmay yomgʼir yogʼishiga qaramay, universitet jamoasi xonadonlardagi ahvol bilan tanishib oʼzlarining yordamlarini ayamadilar, xonadon egalariga tom qismini qayta tuzatishga, mavjud talafotdan soʼng toʼplanib qolgan xoʼjalik mollari chiqindilarini maxsus mashinalarga yuklashda yaqindan yordam berishdi.“27 aprel kuni kechqurun qishlogʼimizda toʼfon boʼlib, barcha xonadonlarning shiferi, tom qismini, uylarning bir qismini uchirib olib ketdi. 28 aprel erta tongdan boshlab biz barcha mahalla faollari, mahalla xodimlari, oqsoqol vakillari birgalashib mahalladagi 640 nafar xonadonni koʼrib analiz qilib chiqdik. Shunda qaysi xonadonning toʼliq yiqilgan, qaysi xonadonning tomi yarmisi, yana qaysi xonadon tomining “strapilasi” singanligi toʼgʼrisida hisobot berib tuman markazida tashkil etilgan shtabga taqdim qildik. Buxoro davlat universiteti 2020 yilning 1 may kunidan boshlab Boʼribek-Chandir MFYga biriktirilgan edi. Universitet rektori Obidjon Xamidov boshchiligida prorektorlar, barcha fakultet dekanlari, universitet xodimlari kelib Boʼribek-Chandir MFYda oʼz ishlarini tashkil qilib, kam taʼminlangan oilalarga, xonadonlarga kirib, tushuntirish ishlarini olib borib, ularni tom qismini ochishda, shiferlarni pastga tushirishda yaqindan yordam berib ishlamoqdalar. Shuningdek, universitet rektori boshchiligidagi ishchi guruh ekskovatorlarni tashkil qilib qishlogʼimizda har kuni 120-150 tonnaga singan xoʼjalik mollarini yigʼib olib ketishda yaqindan yordam bermoqdalar. Bularga avvalambor shu qishlogʼimizning 640 ta xonadoni nomidan chin koʼngildan oʼz minnatdorchiligimni bildiraman” – deydi Boʼribek-Chandir mahalla fuqarolar yigʼini faoli, tuman kengashi deputati Zokir ObloqulovTabiiy ofat tufayli zarar koʼrgan xonadonlarga yordam berish jarayoni davom etmoqda. Buxoro davlat universiteti Matbuot xizmati
