Oʼzbekiston Respublikasi Bosh vaziri tomonidan “2019 yil 11 dekabrda imzolangan “Oʼzbek tilining davlat tili sifatida qoʼllanilishini kengaytirish, rivojlantirish, ilmiy tadqiqotlarni qoʼllab quvvatlash, oʼqitish metodikasini takomillashtirish boʼyicha 2019-2020 yillarga moʼljallangan chora-tadbirlar dasturi”da “Oʼzbek shevashunosligi markazi”ni tashkil etish koʼzda tutilgan. Shu maʼnoda Markaz faoliyatini yoʼlga qoʼyish va shevashunoslik boʼyicha olib borilayotgan ishlarni uygʼunlashtirish uchun Аlisher Navoiy nomidagi Toshkent davlat oʼzbek tili va adabiyoti universitetida “Oʼzbek shevashunosligi markazi”ning taʼsis yigʼilishi boʼlib oʼtdi. Yig'ilishda Buxoro davlat universiteti Filologiya fakulteti professori Jo'rayeva Bibish Muhsinovna qatnashdi.Markazning bosh maqsadi oliy taʼlim muassasalari va ilmiy tadqiqot instituti hamda tashabbuskor guruhlarda oʼzbek shevalarining oʼrganilishini rejalashtirish va muvofiqlashtirishdan iborat. Shuningdek, oʼzbek shevalarining fonetik, leksik, grammatik va sotsiolingvistik xususiyatlarini tadqiq qilish, ularning mualliflar guruhini shakllantirish, tayyorlanajak oʼzbek shevalari lugʼatlari, matnlari, xalq ogʼzaki ijodi namunalari, monografiya va maqolalarni muhokama qilish va nashrga tavsiya berish markazning asosiy vazifalaridan sanaladi.Markazning zarurati, Nizomini tasdiqlash va rahbarini tayinlash, Markazning 2030 yilgacha moʼljallangan konsepsiyasi va “Yoʼl xaritasi”ni shakllantirish, oʼzbek shevashunoslari oldida turgan dolzarb vazifalarga bagʼishlangan qator masalalar majlis kun tartibidan oʼrin oldi. Shuningdek, yigʼilishda oʼzbek shevalarini oʼrganishning yangi innovatsion metodlarini joriy etish, shevalarni yozib olishda lotin alifbosi asosidagi takomillashtirilgan transkriptsion tizimdan foydalanish, dialektologiya fanlarining oʼqitilishi, pedagog xodimlar bilan taʼminlanishi muammolari, oliy taʼlim muassasalari bilan hamkorlikda koʼrgazmali mashgʼulotlar, master-klasslar oʼtkazish, magistratura taʼlimini takomillashtirish, oʼzbek dialektologlari safini yosh kadrlar bilan toʼldirib borish, ularning “ustoz-shogird” tizimida ishlashini tashkil etish yuzasidan taklif va tavsiyalar bildirildi.Majlis davomida Markazning 20 kishidan iborat ishchi guruhi shakllantirildi. Dialektologik tadqiqotlarni asosan uch yoʼnalishda olib borishga kelishib olindi:- hozirga qadar oʼrganilmagan shevalar va muqaddam (ellik yildan oshgan) oʼrganilgan shevalarni anʼanaviy – qiyosiy-tarixiy metodda oʼrganish;- tarixiy dialektologiyani yaratish; - oʼzbek areal lingvistikasini takomillashtirish.
