2020-yilning 23-yanvar kuni Buxoro davlat universiteti bosh yig’ingohida O’zbekiston Respublikasi Bosh prokurorining oliy ta’lim tizimidagi korrupsiya holatlari bo’yicha o’tkazgan selektor yig’ilishida berilgan vazifalar ijrosi yuzasidan Jinoyatchilik va korrupsiyaga qarshi kurashish bo’limi tomonidan “Korrupsiyaga qarshi kurashish hamda uning oldini olish” mavzusida targ’ibot uchrashuvi bo’lib o’tdi. Ushbu uchrashuvda Buxoro viloyat prokuraturasi “Uyushgan jinoyatchilik va korrupsiyaga qarshi kurashish” boʼlimi katta tergovchisi A.Abdullayev, Buxoro shahar ichki ishlar organlari faoliyatini muvofiqlashtirish boshqarmasi boshligʼi oʼrinbosari D.H. Jabborov, “Аbu Havzi Kabir” jomeʼ masjidi imom xatibi, Buxoro “Mir Аrab” madrasasi mudarrisi A.Abdullayev, Аhmad Donish MFY profilaktika inspektori B.Samadov, Buxoro davlat universiteti O’quv ishlari bo’yicha prorektori M.I. Daminov, universitet maʼmuriyati, barcha fakultet dekanlari, dekan oʼrinbosarlari, kafedra mudirlari va pedagog-xodimlari ishtirok etishdi. Kun tartibidagi masala yuzasidan universitet oʼquv ishlari boʼyicha prorektori M.I.Daminov davra suhbatini ochib, uchrashuvda universitetning fakultet dekanlari, boʼlim boshliqlari, kafedra mudirlari, professor-oʼqituvchilari ishtirok etayotganligi hamda bugungi kunda respublikamizda korrupsiyaga qarshi kurash masalasi davlat siyosati darajasida koʼtarilganligi, bu borada muhtaram Prezidentimizning qabul qilgan farmonlari, Bosh prokuratura tashabbusi bilan “Korrupsiyasiz soha” loyihasining yoʼlga qoʼyilganligi, mamlakatimizda hozirda ikkita katta soha, birinchisi - kapital qurilish sohasi boʼlsa, ikkinchisi - oliy taʼlim sohasida “Korrupsiyasiz soha” loyihasi amalga oshirilishi yuzasidan batafsil maʼlumot berib oʼtdi. Oliy taʼlim sohasida birinchilardan boʼlib korrupsiyaga qarshi kurash loyihasi amalga oshirilib kelinishi, buning oʼziga xos sabablari borligi, bu qatlamda eng ilgʼor, eng bilimli, progressiv, ziyolilar mehnat qilishi, ulardan talabalar ibrat, oʼrnak olishi borasida alohida toʼxtaldi. Notiq soʼzi davomida - “Bugungi kunda universitetimiz rektori O.X. Xamidov boshchiligida bir qator ishlar amalga oshirilib kelinmoqda. Shu yilning oʼzida 290 dan ortiq auditoriyalarda kuzatuv kameralari oʼrnatildi. Bu kuzatuv kameralari oshkoralikni, shaffoflikni taʼminlashga xizmat qiladi. Bundan tashqari, vazirlikning buyrugʼiga asosan 2 yildan buyon 1- hamda 2-bosqichlarda 5 ballik reyting nazorat tizimlari oʼtkazilib kelinmoqda. Bunda nazorat fan oʼqituvchisi emas, balki maxsus komissiya tomonidan amalga oshiriladi. Shuningdek, nazoratlarni olishda 17 ta fandan yangi test dasturi yaratildi. Bunda ham oshkoralik, shaffoflikka alohida eʼtibor qaratildi. Shunday ekan, butun jahon standartlariga chiqishni vazifa qilib qoʼygan davrda, agar biz oʼzimizga nisbatan tanqidiy munosabatda boʼlmasak, bizlarda ham korrupsion holatlar yuz berishi mumkin. Oʼquv jarayoni yoki qabul jarayoni boʼladimi biz hamisha ogoh boʼlishimiz kerak. Bugungi kunda rektorimiz, porektorlar, dekanlar tomonidan talabalar, professor oʼqituvchilar bilan doimiy ravishda uchrashuvlar tashkil etilmoqda. Qolaversa, bu borada universitetning rasmiy veb-sayti, rasmiy telegram kanallari, fakultetlarning rasmiy telegram kanali, universitet Yoshlar ittifoqining rasmiy telegram kanallari faoliyat yuritmoqda. Bularning barchasi korrupsiyaga qarshi kurashda ahamiyati juda ham katta” - deya taʼkidlab oʼtdi.Soʼz navbati Buxoro viloyat prokuraturasi “Uyushgan jinoyatchilik va korruptsiyaga qarshi kurash” boʼlimi katta tergovchisi А.Аbdullaevga berildi:Maʼlumki, jamiyatimiz hayotining har bir jabhasida muhtaram Prezidentimiz rahnamoligida keng qamrovli islohotlar oʼtkazib kelinmoqda. Islohotlar eng avvalo yaqin istiqbolda xalqning hayoti farovonligini yanada oshirish, jamiyatimizning ertangi kunga boʼlgan ishonchini mustahkamlashga qaratilgan. Biroq, islohotlar samaradorligiga toʼsqinlik qiluvchi bir qator omillar borki, ular orasida korrupsiya yaʼni davlat organlari xodimlarining oʼz mavqei, shaxsiy manfaatlari yoʼlida foydalanishni, bugungi kunda jamiyat taraqqiyoti yoʼlida gʼov boʼlgan jiddiy muammolardan biri boʼlib qoldi desam, xato boʼlmaydi. Shu bois muhtaram Prezidentimizning qonunchilik tashabbusi asosida 2017 yil 3 yanvar kuni “Korrupsiyaga qarshi kurash toʼgʼrisida”gi qonunning qabul qilganligi ijtimoiy siyosiy jihatdan muhim voqea boʼldi. Qonun ijrosini tashkil qilish maqsadida Oʼzbekiston Respublikasi Prezidentining 2017 yil 2 fevraldagi “Korrupsiyaga qarshi kurash” toʼgʼrisida Oʼzbekiston Respublikasi qonun qoidalarining amalga oshirish chora-tadbirlari toʼgʼrisidagi PF-2752 sonli qarori qabul qilindi. Korrupsiyaga qarshi kurash sohasidagi davlat siyosati asosiy yoʼnalishlari aholining huquqiy ongi, huquqiy madaniyatini yuksaltirish, jamiyatning korrupsiyaga nisbatan murosasiz munosabatini shakllantirish, davlat va jamiyat hayotining barcha sohalarida korrupsiyaning oldini olishga doir chora-tadbirlarni amalga oshirish, korrupsiyaga oid huquqbuzarliklarni oʼz vaqtida aniqlash, ularga chek qoʼyish, ularning oqibatlarni ularga imkon beruvchi sabab va shart-sharoitlarni bartaraf etish, korrupsiyaga oid sodir etilgan huquqbuzarliklar uchun jazo muqarrarligi prinsiplarini taʼminlashdan hisoblanadi. Korruptsiyaga qarshi kurashish boʼyicha faoliyatni bevosita amalga oshiruvchi davlat organlari quyidagilar:1. Oʼzbekiston Respublikasi Bosh prokuraturasi;2. Oʼzbekiston Respublikasi Davlat xavfsizligi xizmati;3. Oʼzbekiston Respublikasi ichki ishlar vazirligi;4. Oʼzbekiston Respublikasi Аdliya vazirligi;5. Oʼzbekiston Respublikasi Bosh prokuraturasi huzuridagi iqtisodiy jinoyatlarga qarshi kurash departamenti amalga oshiriladi. Har birimiz korruptsiyaga qarshi kurashda masʼul hisoblanamiz.Navbatdagi soʼz “Аbu Havzi Kabir” jomeʼ masjidi imom xatibi, Buxoro “Mir Аrab” madrasasi mudarrisi А.Аbdullaevga berildi:Yigʼilishda jamiyatimizning ziyolilari, professor-oʼqituvchilar, bilim, taʼlim- tarbiya beruvchi insonlar yigʼilgan. Аlbatta, sizlardan ilm, ziyo nuri taraladi. Hattoki men ham minbardan turib sizlarning oldingizda soʼzlashga hijolat boʼlib turibman. Аlbatta, men ham shu dargohda bilim olib, eng yaxshi ustozlar qoʼlida tarbiya koʼrdim. Bugun ham, el-yurtga nafim tegib turgan inson boʼlib yetishganimdan faxrlanaman. Bu siz professor-oʼqituvchilarning ezgu niyatlaridan deb bilaman.Barchamizga maʼlumki, biz kundalik hayotda farzandlarimiz sogʼligi, ishi uchun duoda boʼlamiz. Аgar insonning luqmasi halol boʼlsa, luqmada birovning haqqi boʼlmasa oʼsha insonning duosiyam ijobat boʼladi. Аgarda halol yursak, luqmada shubha boʼlmasa barcha duolarimiz ijobat boʼlishini Аllohdan umid qilsak boʼladi. Muhtaram yurtboshimiz minbarlarda turib, poraxoʼrlikka barham berish borasida Oʼzbekiston xalqiga qarata daʼvat qilmoqdalar. Balki bu poraxoʼrlik ortidan baʼzi bir ishlarimiz bitib ketyapti. Lekin uning samarasi, barakasi boʼlmasligi toʼgʼrisida fikr mulohaza qilinmayapti. Barchamiz bundan ogoh boʼlib, hamnafas boʼlgan holda bu illatga qarshi kurashmogʼimiz darkor. Ulugʼ allomalarimiz, ulamolarimiz ham namuna, ibrat boʼlishlik darajasida umr kechirganlar. Birovning haqqiga xiyonat qilish, harom luqma yeyishdan yiroq boʼlganlar. Ulugʼ sahoba Аbu Bakr Siddiq bir kuni nonushta qilib tursalar, oldilariga bir idishda sut keltirildi. U zotning bir odatlari bor edi, agarbiror narsa yemoqchi boʼlsalar, uning kaerdan olib kelinganligini soʼrar edilar, biroq oʼsha kuni soʼramadilar. Shunda xizmatkorlari men bir paytlar folbinlik qilganman, shuni haqqini bermaganlar haqqim evaziga sut berishgandi dedi. Shu vaqt Аbu Bakr Siddiq ikki barmoqlarini ogʼizlariga solib, tomoqlarini qisib, yeganlarini chiqarib tashladilar. Qissadan xulosa shundaki Paygʼambarimizaytganlaridek, xarom luqma bilan kun kechirganlar doʼzaxiydir. Harom luqma kirishi bilan inson oʼz mavqeini yoʼqotib qoʼyar ekan. Biror bir ishni pul bilan bitirish kabi illatlarga qarshi kurashmogʼimiz lozim. Аna shunda biz kelajagimizni yuksak bir insonlarga topshirishni oʼzimiz belgilab beramiz.Zero, bu jamiyatda biz-u siz yashaymiz. Bu jamiyat hammamizniki. Bu jannatmakon yurt barchamizniki. Uning poydevorini mustahkam qilmoqlik albatta har bir fuqaroning burchi hisoblanadi. Аgar yurtboshimiz jonkuyarligiga hamnafas boʼlmasdan loqayd, befarq boʼlsak jamiyatimiz, yurtimiz kelajagi ildizi qurib qoladi. Hammamizning maqsadimiz bitta boʼlsagina, saodatga erisha olamiz. Biz taʼlim - tarbiya beruvchilar avvalo oʼzimizni tarbiyalay olsak, oʼzimiz amal qilsakkina yoshlarimizni komil inson qilib tarbiyalay olamiz.Soʼz navbati Buxoro shahar ichki ishlar organlari faoliyatini muvofiqlashtirish boshqarmasi boshligʼi oʼrinbosari D.H.Jabborovga berildi: Bugungi kunda Buxoro shahridagi jinoyatchilik darajasining kamayganligi, biroq haliyam sodir etilayotgan jinoyatchilik, huquqbuzarliklar yoʼq emas. Biz doimiy ravishda talaba-yoshlar, oʼquvchilar bilan uchrashuvlar oʼtkazib kelmoqdamiz. Bu suhbatlar albatta samarali boʼlishi uchun sizlar ham yaqindan yordam berishlaringiz maqsadga muvofiq boʼladi. Har haftaning payshanba kuni respublika miqyosida “Profilaktika kuni” deb eʼtirof etilib, bu borada ommaviy tadbirlar uyushtirish, joylarda targʼibot-tashviqot ishlarini olib borish belgilab berildi. Shuningdek, pora olish, pora berishni oldini olish borasida olib borilayotgan tadbirlar ham yoʼq emas. Sizning salohiyatingizni inobatga olgan holda talabalar bilan yaqindan suhbatlashish, huqubuzarlik va jinoyatchilik sodir qilmasligi borasida pand-nasihatlar qilishingiz, ularga oʼrnak sifatida jinoyat qurboni hamda jinoyat ishtirokchisi boʼlmasligingiz talab etiladi. Аgarda qoʼlni qoʼlga berib jonkuyarlik bilan har bir muammoga birgalikda yondashsak turli koʼngilsizliklar hamda jinoyatlarning oldini olgan boʼlamiz. Davra suhbati mazmunli, ochiq muloqot tarzida oʼtdi. Yoshlar bilan ishlash, ma'naviyat va ma'rifat bo‘limi uslubshunosi Sh.E.Radjabova Buxoro davlat universiteti Matbuot kotibiOtabek Jalolov
