Bugungi kunda axborot texnologiyalari hamda ommaviy axborot vositalari rivojlanib borayotgan bir paytda, har qanday ma'lumot, voqea hodisalarni insoniyat nazaridan chetda qoldirish mushkul bo‘lib qoldi. Internet, uyali aloqa vositalari, turli texnologiya biz uchun begona bo‘lmay qoldi.Xalqimizning yashash tarzi, ongi o‘zgardi. Jamiyatimizning aksariyati o‘z haq-huquqlari, erkinliklarini anglab yeta oladigan darajada yuksaldi. Biroq o‘zbekchilikda mentalitetimizga xos bo‘lmagan ba'zi bir ma'lumotlarni, kinofilmlarni, behayo suratlarni internet orqali ko‘rganimizda yoqa ushlaymiz,o‘sib kelayotgan yosh avlod kelajagi uchun yurak hovuchlaymiz. Axir shu jamiyatda barchamizning bobo-buvilarimiz, ota-onalarimiz, aka-ukalarimiz, opa-singillarimiz yashab kelmoqda. Shu o‘rinda bir savol tug‘iladi, milliy qadriyatlarimizga, urf-odatlarimizga xos bo‘lmagan muammolarning barchasini internet tarmog‘iga joylashtirishimiz lozimmi? Qolaversa, ota-bobolarimiz o‘z umrlari davomida jamiyat, oila, ro‘zg‘or ishlarida bir-birlarining borini oshirib, kamini yashirib kelishgan, hatto yangi xonadonga kelin bo‘lib tushgan qizlarimizga onajonlarimiz hali bilmagan hayot saboqlaridan dars berib kelishgan. Ahillik, jipslik, birdamlik xalqimiz turmush tarzining asosi sanalgan."Butunjahon internet tarmog‘ida axborot xavfsizligini yanada takomillashtirish chora-tadbirlari to‘g‘risidag"i hukumat qarori qabul qilinganidan barchamizning xabarimiz bor. Qaror bilan O‘zbekiston Respublikasi Qonunchiligi bilan tarqatilishi taqiqlangan axborot mavjud bo‘lgan Internet tarmog‘i veb-saytidan va (yoki) veb-sayt sahifalaridan foydalanishni cheklash tartibi to‘g‘risidagi nizom tasdiqlandi. Nizomga ko‘ra, taqiqlangan axborot mavjud bo‘lgan butunjahon internet tarmog‘idagi axborot resurslari reyestri yuritiladi. Ushbu reyestrga kiritilgan axborot resurslaridan foydalanish cheklanadi. Xuddi shunday masalalarni inobatga olib, Buxoro davlat universiteti “Odob axloq qoidalari”ning 3-bo‘lim “Jamoa a'zolarining odob axloqiga oid umumiy qoidalar”ning 3.9-3.10 bandlarida “Milliy umumbashariy qadriyatlarga xos bo‘lmagan yoki Buxoro davlat universitetining ichki muammolariga taalluqli masalalarni internet tarmog‘iga joylashtirish yoki undan turli maqsadlar yo‘lida foydalanish ta'qiqlanadi”, “Kompyuterlarda Buxoro davlat universitetiga tegishli bo‘lmagan ma'lumotlarni, shuningdek, turli kinofilmlar, noqonuniy diniy ma'lumotlar, behayo suratlar, milliy, irqiy, etnik, diniy adovatni targ‘ib qiluvchi har qanday materiallarni tayyorlash, saqlash, tarqatish va targ‘ib etish qat'iyan man etiladi” deb ta'kidlab o‘tilgan. Yoshlar bilan ishlash, ma`naviyat va ma`rifat bo`limi tomonidan tayyorlandi. Buxoro davlat universiteti matbuot xizmati xodimi: Javohir Saidov
