2019 yil 18 va 19 noyabr kunlari soat 15:00 da Buxoro davlat universiteti Xorijiy tillar va Filologiya fakultetlarida Oʼzbekiston Respublikasi Oliy va oʼrta maxsus taʼlim vazirligining joriy yilning 24 yanvardagi “Vazirlik tasarrufidagi oliy taʼlim muassasalari, Oʼrta maxsus, kasb-hunar taʼlimi hududiy boshqarmalari, kasb-hunar kollejlari va akademik litseylarda fuqaro muhofazasi boʼyicha 2019 yildagi amalga oshirilishi kerak boʼlgan vazifalar toʼgʼrisida” gi 1-XFU buyrugʼi hamda joriy yilning 5 fevralda “Buxoro davlat universitetida fuqaro muhofazasi boʼyicha 2019 yilda amalga oshirilishi kerak boʼlgan vazifalar toʼgʼrisida” gi 101-U sonli buyruqlari ijrosini taʼminlash maqsadida universitet talabalari bilan “Botulizm – xavfli kasallik, zaharlanishdan ehtiyot boʼling” mavzusida koʼrgazmali seminar oʼquv mashgʼuloti oʼtkazildi.Seminar mashgʼulotida Buxoro viloyat Favqulodda vaziyatlar boshqarmasi profilaktika inspektori N.Nurullaeva va shu boshqarma xodimi leytenant N.Hamidovlar hamda 160 nafar universitet talabalari ishtirok etdilar. Seminar mashgʼulotini Buxoro davlat universitet Fuqaro va mehnat muhofazasi boʼlim boshligʼi F.Boltaev ochib, kun tartibidagi masala bilan oʼquv mashgʼuloti ishtirokchilarini tanishtirib oʼtdi. Seminar mashgʼulot rejasida koʼrsatilgan tavsiyalar bilan bir qatorda oʼz yoʼnalishlari boʼyicha maʼruza va video roliklar namoyish qilindi. Jumladan: Buxoro viloyat Favqulodda vaziyatlar boshqarmasi profilaktika inspektori Nargiza Nurullaeva soʼzga chiqib, Botulizm – lotincha botulus - kolbasa soʼzidan olingan boʼlib, asab tizimining zararlanishi bilan namoyon boʼladigan, ogʼir zaharlanish kasalligi ekanligi, kasallik qoʼzgʼatuvchisi tabiatda keng tarqalgan anaerob bakteriya boʼlib, botulizm tayoqchasi tuproqda spora hosil qilib uzoq saqlanishi mumkinligi, bakteriyalar odam organizmiga sanitariya qoidalariga toʼliq amal qilinmasdan tayyorlangan konserva mahsulotlari, tuproq, chorva mahsulotlari, meva, sabzavot, don, goʼsht mahsulotlari va boshqalar orqali tushishi mumkinligini taʼkidlab oʼtdi. Shu bilan birga kislorodsiz sharoitda bakteriyalar tez rivojlanadi va kuchli zahar boʼlgan toksin ajratishi, botulotoksin oshqozon va ichak kislotalarida parchalanmasligi, bosh va orqa miyani zararlashi natijasida muskullar ishdan chiqadi va natijada rivojlanib boradigan oʼtkir nafas yetishmasligi kelib chiqishi, kasallik qoʼzgʼatuvchisi va toksinlarning organizmga nafas olish, oshqozon-ichak, shikastlangan teri orqali tushish yoʼllari borligi, kasallik qoʼzgʼatuvchisi odamdan-odamga oʼtmasligi, odamzod paydo boʼlgandan buyon botulizm kasalligi mavjud deb taxmin qilinganligi, lekin 1793 yilda Germaniyaning Vyurtemberg shahrida kolbasa isteʼmol qilgan 13 kishidan 6 tasi oʼlgandan keyin bu kasallik rasman qayd etilganligi, keyinroq 1817-1822 yillarda Yu. Kerner kasallikning birinchi klinik hamda epidemiologik tavsifini bayon etganligi va 1822 yilda nashr etilgan oʼz monografiyasida kasallik belgilari (qusish, ich ketish va boshqa xos belgilar)ni yoritib berganligini taʼkidladi.