2019 yil 14 va 15 noyabr kunlari Buxoro davlat universiteti Fizika-matematika fakulteti va Tabiiy fanlar fakultetlarida Buxoro viloyat hokimligining 2019 yil 6 noyabrdagi № 3/5089-12-sonli “Viloyat hududida is gazidan fuqarolarning zaharlanishi, is gazi bilan bogʼliq sodir boʼlishi mumkin boʼlgan yongʼinlar, gaz va havo aralashmasining chaqnashi hamda boshqa noxush holatlarni oldini olish borasida amalga oshiriladigan kompleks chora-tadbirlar rejasi hamda Buxoro davlat universitetining 2019 yil 11 noyabrdagi chora-tadbir rejasi ijrosini taʼminlash maqsadi “Is gazidan zaharlanishni oldini olish va yongʼinlar profilaktikasi” mavzusida koʼrgazmali seminar oʼquv mashgʼuloti oʼtkazildi.Seminar mashgʼulotlarida Buxoro viloyat Favqulodda vaziyatlar boshqarmasi xodimi leytenant N.Hamidov va shu boshqarma profilaktika inspektori N.Nurullaeva hamda mazkur fakultetlarning 200 nafardan ortiq talabalari ishtirok etdilar. Seminar mashgʼulotini Buxoro davlat universitet Fuqaro va mehnat muhofazasi boʼlim boshligʼi F.Boltaev ochib, kun tartibidagi masala bilan oʼquv mashgʼuloti ishtirokchilarini tanishtirib oʼtdi. Seminar mashgʼulot rejasida koʼrsatilgan tavsiyalar bilan bir qatorda oʼz yoʼnalishlari boʼyicha maʼruza va video roliklar namoyish qilindi. Jumladan: Buxoro viloyat Favqulodda vaziyatlar boshqarmasi profilaktika inspektori Nargiza Nurullaeva soʼzga chiqib, is gazidan zaharlanishni oldini olish, respublikada sodir boʼlayotgan yongʼinlar, elektr va issiqlik energiyasi, koʼmirdan xavfsiz va oqilona foydalanishda texnika va yongʼin xavfsizligi qoidalariga amal qilinishi hamda joylarda xizmat tomonidan rejadagi bajarilgan profilaktik tadbirlar, ularni samaradorligini oshirish maqsadida tegishli xizmatlar bilan oʼzaro hamkorlikni yoʼlga qoʼyish haqida gapirib oʼtdi. Universitet yongʼin xavfsizligi boʼyicha instruktori Shuxrat Boltaev soʼzga chiqib, Buxoro davlat universitetda yongʼinlarni oldini olish profilaktikasi boʼyicha amalga oshirilayotgan ishlar toʼgʼrisida toʼxtalib, universitet hududida ayniqsa Talabalar turar joylarida turli xildagi qoʼlbola usulda yasalgan yongʼin chiqish xavfini keltirib chiqaruvchi isitish va choy qaynatish moslamalaridan foydalanish oqibatlari toʼgʼrisida maʼlumot berib oʼtdi.Oʼquv mashgʼuloti yakunida universitet Fuqaro va mehnat muhofazasi boʼlim boshligʼi Fatillo Boltaev oʼquv mashgʼulotiga tashrif buyurgan mutaxassislar va ishtirokchilarga minnatdorchilik bildirib, ular tomonidan berilgan maʼlumotlar talabalarga qiziqarligi toʼgʼrisida aytib oʼtdi.