Buxoroda Prezidentimiz Islom Karimovning joriy yil 6 fevralda qabul qilingan “O`zbekiston Respublikasida yoshlarga oid davlat siyosatini amalga oshirishga qaratilgan qo`shimcha chora-tadbirlar to`g`risida”gi qarori ijrosi doirasida yosh olim va talabalarning “XXI asr – intellektual avlod asri” shiori ostida respublika ilmiy-amaliy anjumani bo`lib o`tdi.O`zbekiston Respublikasi Oliy va o`rta maxsus ta’lim, Xalq ta’limi vazirliklari, Fanlar akademiyasi, "Kamolot" yoshlar ijtimoiy harakati, “Iste’dod” jamg`armasi, Buxoro viloyati hokimligi va boshqa qator tashkilotlar hamkorligida o`tkazilgan tadbirda Prezidentimiz rahnamoligida amalga oshirilayotgan keng ko`lamli islohotlar jarayonida iste’dodli, yuksak intellektual salohiyatli yoshlarni tarbiyalash, ularning ilmiy-ijodiy izlanishlarini qo`llab-quvvatlash va rag`batlantirishga ustuvor vazifalardan biri sifatida qaralayotgani alohida ta’kidlandi.Joylarda zamonaviy ta’lim muassasalari, axborot-resurs, yoshlar markazlari, bolalar sporti inshootlari barpo etilib, jahon andozalari darajasida jihozlanayotir. Bu boradagi ishlar farzandlarimiz ma’naviyatini yuksaltirish, salomatligini mustahkamlash, ilm-fan va sport bilan shug`ullanishi uchun yaratilayotgan sharoitlarni yanada yaxshilash imkonini bermoqda.Davlatimiz rahbari Islom Karimov rahnamoligida fan va texnologiyalar modernizatsiyasi bo`yicha amalga oshirilayotgan islohotlar samaradorligini oshirish, yurt taraqqiyotining har bir jabhasida yoshlarning iqtidori, ilmiy salohiyati va shijoatidan unumli foydalanish tobora dolzarb ahamiyat kasb etmoqda. Bu zamonaviy axborot-kommunikatsiya texnologiyalarini puxta o`zlashtirgan, murakkab va keng ko`lamli vazifalarni uddalashga qodir etuk yosh olimlarni tarbiyalashga ko`maklashish, ular o`rtasida hamkorlikni rivojlantirish, ilmiy faoliyatini qo`llab-quvvatlash bilan bog`liq bo`lib, anjuman maqsadi ayni shunga yo`naltirilgan.– Istiqbolli yosh pedagog va ilmiy kadrlar malakasini oshirish, mamlakatimiz ilm-fani ravnaqini ta’minlashga munosib hissa qo`shish jamg`armamizning asosiy vazifalaridan, – deydi "Iste’dod" jamg`armasi ijrochi direktori A.Pardaev. – "XX1 asr – intellektual avlod asri” shiori ostida tashkil etilgan respublika ilmiy-amaliy konferentsiyasi bu boradagi ishlarimizni rivojlantirish, yosh olim va talabalarni rag`batlantirish, ularning o`zaro tajriba almashishini ta’minlashga xizmat qilmoqda.Anjumanda qatnashish uchun joylarda o`tkazilgan tadbirlarda Qoraqalpog`iston Respublikasi, viloyatlar va Toshkent shahridan 35 yoshgacha bo`lgan yosh olim va talabalar o`z ilmiy maqola va ma’ruzalari bilan ishtirok etdi. Saralash vazifasini o`tagan ushbu ilmiy-amaliy tadbirlarda tadqiqotlar tahliliyligi, ilmiy asoslangani, taklif va tavsiyalarning aniq bayon etilgani, mavzuning dolzarbligi kabi mezonlarga alohida e’tibor qaratildi.Ikki kun davom etgan anjumanda hududiy bosqichlarda sovrinli o`rinlarga munosib ko`rilgan 81 iste’dod sohibi ishtirok etdi. Ular orasida yosh olim, Qarshi muhandislik-iqtisodiyot instituti magistranti Akmal Vohidov ham bor.– Anjumanda issiqxona va uy-joylarni issiqlik bilan ta’minlashga mo`ljallab o`zim yaratgan qurilma loyihasi taqdimotini o`tkazdim, – deydi Akmal. – U elektr va quyosh energiyasi asosida ishlaydi. Energiya tejash va atrof-muhit musaffoligini ta’minlashga xizmat qiladigan bu loyiha ishtirokchilarda katta qiziqish uyg`otganidan xursandman. Mutaxassis va olimlar ushbu qurilmani yanada takomillashtirish bo`yicha taklif va tavsiyalar bildirdi.O`zbekiston Respublikasi Fanlar akademiyasining Bioorganik kimyo instituti katta ilmiy xodimi S. SHerimbetov, Buxoro davlat universiteti kafedra mudiri H.Jo`raev, Qarshi davlat universiteti katta o`qituvchisi I.Yo`ldoshev va boshqa yosh olim hamda talabalarning bioxilma-xillik, muqobil va geotermal energiya manbalaridan foydalanish samaradorligi, kompyuter sinflarini boshqarish, inklyuziv ta’lim tizimining nazariy asoslariga oid ma’ruzalari tinglandi. Ijtimoiy-gumanitar, texnika, tabiiy va aniq fanlar bo`yicha bo`lib o`tgan sho`’ba yig`ilishlarida sanoat va qishloq xo`jaligi sohalaridagi dolzarb masalalar hamda ularning echimlarini topish bo`yicha izlanishlar, yangiliklarning qo`llanish tajribasi, ta’lim samaradorligini oshirishda innovatsion texnologiyalardan foydalanish istiqbollari, ekologiya va atrof-muhit muhofazasi, inson huquqlari, barkamol avlodni tarbiyalashning o`ziga xos jihatlari haqida so`z yuritildi.Konferentsiya ishtirokchilari viloyatdagi bir qator ta’lim muassasalari o`qituvchi va talabalari tomonidan yaratilgan ishlanmalar, darslik va qo`llanmalar, ilm-fan, madaniyat, sport va boshqa sohalarda erishilayotgan yutuqlar aks etgan ko`rgazmalar bilan tanishdi.Ilmiy-amaliy konferentsiya yakunida tegishli fanlar yo`nalishlari bo`yicha g`olib va sovrindorlar aniqlanib, diplom va qimmatbaho sovg`alar bilan taqdirlandi.Erkin Yodgorov,Tohir Istatov(surat), O`zA
