Oʼzbekiston Respublikasi Prezidentining 2018 yil 28 noyabrdagi «Oʼzbekiston Respublikasida milliy madaniyatni yanada rivojlantirish kontseptsiyasini tasdiqlash toʼgʼrisida»gi qaroriga koʼra 2019-2020 yillarda Buxoro viloyatida ushbu kontseptsiyasini ijrosini amalga oshirish boʼyicha chora-tadbirlar dasturi ishlab chiqildi.Ushbu dastur asosida Buxoro viloyat hokimligi, Buxoro viloyat madaniyat boshqarmasining va Buxoro davlat muzey-qoʼriqxonasining chora-tadbirlar rejasi ishlab chiqildi. Ushbu chora-tadbirlar rejasi asosida Buxoro davlat muzey-qoʼriqxonasi «Koʼchma koʼrgazmalar» boʼlimi xodimlari tomonidan Buxoro davlat universitetida «Moziy va bugun» deb nomlangan koʼchma koʼrgazma namoyish etildi. Koʼrgazmani BuxDU yoshlar bilan ishlash bo'yicha prorektori А.M. Qodirov ochib berdi. Bugungi koʼrgazma Prezidentimiz Sh.M. Mirziyoyevning 5 muhim tashabbuslari doirasidagi tadbir boʼlib, BuxDU Sanʼatshunoslik fakulteti, BuxDU tuzilmasidagi «Qatagʼon qurbonlari xotirasi muzeyi» hamkorligida tashkil etildi. Koʼrgazmaning ilmiy va amaliy ahamiyati haqida Sanʼatshunoslik fakulteti dekani B. Madrimov soʼzlab, ijodkorlar yoshlarga omad tiladi. BuxDU tuzilmasidagi «Qatagʼon qurbonlari xotirasi muzeyi» direktori А. Hamroev ham BuxDUda mavjud 3 ta muzey borligi, kelajakda respublikamiz va chet el muzeylari bilan hamkorlik qilish lozimligini taʼkidlab oʼtdi.Koʼrgazmada Buxoro davlat muzey-qoʼriqxonasi zahiralaridagi oʼzbek tasviriy sanʼati maktabi, Buxoro zamonaviy ijodkor rassomlarning rangtasvir, grafika, haykaltaroshlik sanʼati ustalarining asarlari keng miqyosida tomoshabinlar hukmiga xavola etildi. Buxorolik mahalliy rassomlar: B.Salomov, Z.Saidjonov, M.Аbdullaev, R.Xakimov, E.Juraev, R.Аvezov, M.Xafizova kabi rassomlarning asarlarida oʼlka tabiati manzaralari, milliy urf-odatlari betakrorligi, har bir ijodkorning olamga, goʼzalikka, hayotga boʼlgan munosabati oʼziga xos turli janr va yoʼnalishlarda ifoda etilgan. Koʼrgazma doirasida oʼlkamiz oʼtmishidagi tarixiy lavhalarni yorituvchi hujjatli film sensorli kiosk orqali namoyish etildi. XX asrning 2-yarmida olingan bu filmda qadimiy Buxoro xalqining oddiy hayoti, oʼtgan kunlarning quvonchlari, tashvishlari va xalq ustalari tomonidan yaratilgan tarixiy meʼmorchilik durdonalarining turli yillarda olingan fotosuratlaridan namunalar namoyish etilgan. Shu bilan bir qatorda Buxoro tasviriy sanʼat muzey filiali ekspozitsiyalaridagi oʼzbek tasviriy sanʼati dargʼalari; S.Pochchaev, P.P.Benьkov, M.Kurzin, Oʼ.Tansiqboev, Ch.Аxmarov, А.Mirzaev, M.Sodiqov kabi rassomlar asarlari slayd-shou koʼrinishida ekranda talqin etiladi.Koʼrgazma professor-oʼqituvchilar, talabalarimiz va mehmonlarimizga katta qiziqish uygʼotmoqda.Koʼrgazmaning asosiy maqsadi-xalqimiz, ayniqsa, yoshlarimizning estetik badiiy dunyoqarashini, ulkan tariximiz va madaniyatimiz merosiga mehr-muxabbatini yanada oshirish, shuningdek, boy milliy tariximizni oʼrganishda, madaniy merosimizni, betakror osoru-atiqalarimizni kelgusi avlodlarga asrab-avaylab yetkazishda muzeylarning jamiyat hayotida tutgan oʼrni nechogʼlik ahamiyatli va dolzarb ekanligini koʼrsatadi.Kelajakda ushbu sanʼat ustalari bilan yosh ijodkor talbalarimizning uchrashuvlarini tashkil qilish va ularning ijodiy hamkorligini yoʼlga qoʼyish asosiy masala qilib belgilab olindi. BuxDU tuzilmasidagi «Qatagʼon qurbonlari xotirasi muzeyi» direktori А.Hamroev
