«Adabiyotning o‘suvi — millatning o‘suviga garov va millat kamolini ko‘rsatuvchi oyna», Shukur XolmirzayevDarhaqiqat, bugunga qadar yozilgan asarlar har bir millatning o‘tmishi, uning taqdirida ro‘y bergan voqealar, bilib-bilmay yo‘l qo‘yilgan xato va kamchiliklardan boxabar etadi. Biz dunyo adabiyotini, jahon tarixini o‘qiyotgan, xorijiy tillarni o‘zlashtirishga intilayotgan bir paytda boshqa mamlakatlar ham yurtimiz tarixini yanada ko‘proq o‘rganishlari lozim emasmi?Alisher Navoiy nomidagi Toshkent davlat o‘zbek tili va adabiyoti universitetida Respublikamizning barcha oliygohlaridan kelgan iqtidorli, ijodkor hamda xorijiy (ingliz, rus, fransuz, nemis) til fakultetlari 1- bosqich talabalari bilan o‘tgan uchrashuvda yuqorida aytilgan va boshqa masalalar yuzasidan so‘z borar ekan, asosan tarjimonlik sohasiga muhim e’tibor qaratish kerakligi alohida ta’kidlab o‘tildi. «Xorijda ta’lim imkoniyati va filologik kadrlar tayyorlashning dolzarb masalalari» mavzusida tashkil etilgan mazkur anjumanda Turkiya universitetlaridan tashrif buyurgan professor o‘qituvchilar so‘zga chiqib, u yerdagi o‘qish sharoitlari va ta’lim tizimi borasida aytib o‘tdi. Shuningdek, Alisher Navoiy nomidagi Toshkent davlat o‘zbek tili va adabiyoti universiteti rektori Shuhrat Sirojiddinov bugungi kunda o‘zbekistonlik talabalarning xorijda tahsil olish imkoniyatlari, yurtimizda ta’lim-tarbiya sohasida olib borilayotgan islohotlar va yangiliklar haqida batafsil ma’lumot berdi. Uchrashuv davomida talabalar tomonidan turli savol va takliflar berildi.Buxoro davlat universitetidan ishtirok etgan biz talabalar ham o‘zimizni qiziqtirgan savollarga javob oldik. Davra suhbatida qatnashib, uning qizg‘in bahs-munozarada o‘tganini rad etolmaymiz. Bir-birini ma’qullovchi, bir-birini inkor etuvchi fikrlar ko‘p bo‘ldi. Erkin suhbat tarzida o‘tgan uchrashuvda bizga kerakli bo‘lgan ancha ma’lumotlarga ega bo‘ldik. Uchrashuvdan so‘ng uning taassurotlarini bir-birimizga ulashar ekanmiz, viloyatdoshim Mushtariy To‘rayeva quyidagicha fikr bildirdi: - Men fransuz tilini o‘rganishga, fransuzlarning yashash tarzi va o‘ziga xos jihatlarini bilish uchun ko‘p izlanaman. Ammo bugungi uchrashuvdan keyin shuni xulosa qildimki, hozirgi kun filologlari faqatgina bitta xorijiy tilni yoki o‘ziga kerak bo‘lgan fanni o‘zlashtirish emas balki, bir nechta chet tillarini o‘rganishi va hech qachon to‘xtab qolmasligi muhim ekan. «Til bilmoq-el bilmoq», deydi xalqimiz. Ha, xorijiy tillarni bilish va o‘rganish yaxshi albatta. Biroq, til - oltin ko‘prik ekan, o‘zimizning o‘lmas asarlarimizni yanada ko‘proq tarjima qilsak, uni dunyo o‘qiydi. Endigina 1-bosqichda tahsil olayotgan biz talabalar tarjimonlik sirlarini ham chuqur egallab, bir qancha xorij tillarini o‘rgansak, mamlakatimizni dunyo xalqlariga tanitishda o‘z hissamizni qo‘shgan bo‘lamiz.Zilola Po`latovaBuxDU talabasi
