Yoki turizmda yangi yo‘nalishBuxoro azaldan bashariyat uchun tamaddun beshigi bo‘lib kelgan, desak mubolag‘a bo‘lmaydi. Islom g‘oyalarini targ‘ib etishda, uni eng yuqori cho‘qqilarga ko‘tarishda Buxoroi sharifda yashab o‘tgan allomalarimiz, ajdodlarimiz xizmatlarini alohida e’tirof etish mumkin. Imom al-Buxoriy, Bahouddin Naqshband, Abduxoliq G‘ijduvoniy, Baxarziy va yana qanchadan-qancha pirlar va avliyolar sharafi bois Buxoro shariflik maqomiga ega bo‘lgan muqaddas zamindir.Ko‘plab bosqinlar, to‘fonlarni boshidan kechirgan bu qadimiy shahar aslo o‘z qiyofasi, milliy urf-odat va an’analarini yo‘qotmadi. Asrlar davomida bir necha bor yonib kul bo‘ldi, vayron etildi, ammo yana Allohning buyuk madadi ila qayta-qayta o‘z o‘rnida qad ko‘taraverdi. Bukildi, lekin sinmadi. Musulmon dunyosi e’tirof etgan yuzlab qalbi illohiy olim-u fuzalolarni, piru komil farzandlarini bag‘rida allalab yotibdi.Buxoroi sharifdan tepaga qarab nur ko‘tarilganini ko‘rgan ekan. Buxoro ana shunday tabarruk, mo‘‘tabar va afsonaviy shahar uni ko‘rishni, ziyorat qilishni istagan o‘nlab mamlakatlar, milliardlab insonlar bor, desak aslo yanglishmaymiz.Shu sababli mamlakatimizda ilk bor 1-Xalqaro ziyorat turizmi forumining Buxoroi sharifda o‘tkazilayotgani bejizga emas. 21-23-fevral kunlari bo‘lib o‘tayotgan ushbu forum O‘zbekiston Respublikasi Turizmni rivojlantirish davlat qo‘mitasi tomonidan Buxoro viloyat hokimiyati, O‘zbekiston Respublikasi Vazirlar Mahkamasi huzuridagi din ishlari qo‘mitasi, O‘zbekiston musulmonlari idorasi “Vaqf” xayriya jamoat fondi, O‘zbekiston Respublikasi Tashqi ishlar vazirligi hamda ISESCO va VNWTO ko‘magi ostida “O‘zbekiston havo yo‘llari” bilan hamkorlikda tashkil etildi. Ayniqsa, Buxoro viloyat hokimligi ushbu forumni kam-ko‘stsiz, go‘zal va jozibador o‘tishi uchun juda katta tayyogarlik ishlarini amalga oshirdi.Avvalo, forum ishtirokchilari Kogon temiryo‘l vakzalida tantanali ravishda kutib olindi. Mehmonlar tashriflarini Bahouddin Naqshband hazratlarining qadamjolarini ziyorat qilishdan boshlashdi. Mir arab madrasasi va Buxoroning diqqatga sazavor tarixiy obidalari tomoshasi ularni hayratga soldi, desak mubolag‘a bo‘lmaydi. Vohadagi yetti pir ziyoratgohida bo‘lgan mehmonlar Buxoroi sharif haqiqatdan ham ziyorat turizmini rivojlantirish uchun ulkan imkoniyatlarga ega shaharlar sirasiga kira oladigan maskan ekanligini e’tirof etishdi.Shuni alohida ta’kidlash joizki, ushbu nufuzli anjumanga ishtirok etish uchun 34 ta davlatdan, jumladan Qatar, Quvayt, Saudiya Arabiston, Singapur, Indoneziya, Malayziya, Pokiston, Qozog‘iston, Ozarbayjon, Turkiya, Nigeriya, Janubiy Afrika, Rossiya, Hindiston, Germaniya, AQSH, Fransiya, Buyuk Britaniya kabi dunyoning ko‘plab mamlakatlari, shuningdek xalqaro tashkilotlarning 120 dan ortiq vakillari tashrif buyurdilar. Qolaversa, turizmning bu yangi yo‘nalishiga bag‘ishlangan tadbirda qatnashishi uchun Qoraqalpog‘iston respublikasi Vazirlar Kengashi raisi, viloyatlar va Toshkent shahri hakimlarining turizmni rivojlantirish masalalari bo‘yicha o‘rinbosarlari hamda O‘zbekiston musulmonlar idorasi vakillari ham Buxoroga yetib kelishdi.Mehmonlarning ko‘pchiligi islom dunyosiga mansubligi bois ularga ibodat amallarini bajarishlari uchun mehmonxonalarda barcha zarur shart-sharoitlar yaratildi. Ziyorat turizmning talablariga ko‘ra mehmonlarga restoran va mehmonxonalarda “Halol” brendi ostida taomlar taklif etildi.Zero, 2018-yildan boshlab mamlakatimizning umumiy ovqatlanish shaxobchalari va restoranlarida “Halol” standartini amaliyotga joriy etish bo‘yicha ishlar olib borilayotir. O‘taversa, o‘tgan yili fevral oyidan boshlab ISO 22000 va “Halol” oziq-ovqat mahsulotlari bo‘yicha umumiy O’z DSI 3286:2018 davlat standarti rasman joriy etilgan.Forum o‘tadigan viloyat Yoshlar markazi mehmonlarni kutib olishga tayyorlandi. Hatto, bino konferensiya zali va matbuot markazi zarur texnikalar, sinxron tarjima qurilmalari, tezkor internet bilan ta’minlandi.1-Xalqaro ziyorat turizmi forumini O‘zbekiston Respublikasi Bosh vazir o‘rinbosari Aziz Abduhakimov ochib berdi. Buxoro viloyat hokimi O‘ktam Barnoyev mehmonlarni musulmon olamida o‘z o‘rniga ega bo‘lgan, buyuk avliyo-yu ambiyolar yurtiga tashriflari bilan qutladi. Anjumandan ko‘zlangan maqsadga to‘xtaldi. O‘zbekiston musulmonlar idorasi raisi muftiy Usmonxon Alimovning ma’ruzasi ham mehmonlar e’tiborini tortdi. Ulug‘bek Qosimxodjayev esa “Mamlakatimizning sayyohlik salohiyati hamda tadbirkorlarning turizm sohasida olib borgan so‘ngi islohotlari to‘g‘risida”gi taqdimotni o‘tkazdi.Shundan so‘ng forum mavzusi yuzasidan Misr ijtimoiy muvofiqlik, oila va nogironlar palatasi raisi, Misr Arab Respublikasi So‘fiylar ordeni Oliy Kengashining raisi Abdulhadi al-Qalabi, Turkiyaning diniy ishlar bo‘yicha qo‘mita raisi o‘rinbosari Osman Tirashchi, Hindistonning Dehli shahri markaziy masjidi imomi Said Buxoriy, “Gunadarma” universiteti rektori, O‘zbekistonning Indoneziyadagi turizm brendi elchisi Eko Shri Margianti, Rossiya muftiylar Kengashi va Rossiya Federatsiyasi Musulmonlari diniy idorasi raisining birinchi o‘rinbosari Abbyasov Rushan hazratlari ham so‘zga chiqdilar. Ular o‘z so‘zlarida O‘zbekistonni, bu hududda yashab o‘tgan allomalarning islom dini va ta’limoti rivojiga qo‘shgan hissalari benihoyat ulug‘ va ulkanligi, shuning uchun bu o‘lkada ziyorat turizmini rivojlantirish maqsadga muvofiqligini ta’kidlashdi.Rasmiy qismlardan so‘ng bo‘limlarda “Yurtimizda yangi sayyohlik mahsulotlarini shakllantirish va ziyorat turizmi salohiyatini oshirish bo‘yicha xalqaro tajribani rivojlantirish”, “Indoneziya hududida Islomning tarqalishida O‘zbekiston olimlarining o‘rni”, “Musulmon sayyohlar uchun xalqaro reyting va uning mamlakat imidjini oshirishga ta’miri”, “Turizmning madaniy me’rosga ta’siri”, “O‘zbekistonda” “halol standarti”ning rivojlanishi” kabi masalalarda xorijiy va mahalliy ekspertlar hamda soha xodimlarining ma’ruzalari tinglandi.Tadbirlar jarayonida forum hamda respublika turistik salohiyatini keng yoritish maqsadida 14 nafar xorijiy OAV vakillari, jumladan “Euronews” (Fransiya), “Al-Jazeera” (Qatar), “Al-Axram al -Iqtisadi” (Misr) jurnali, “Diplomatie News” (Pokiston ), “Kommersant” (Rossiya), “Al-Vajhat” (Ummon) va “Al-Hayat” (Saudiya Arabistoni) gazetalari xodimlari faoliyat olib borishdi. Anjuman kunlari mahalliy va xorijiy OAV uchun forumning chet ellik ishtirokchilari “Istiqlol” muzeyi (Indoneziya), “Crescent Rating” (Singapur), Turkiya din ishlari bo‘yicha qo‘mitasi, “MATTA” uyushmasi (Malayziya) va boshqa tashkilot vakillari bilan matbuot anjumanlari o‘tkazildi.Mamlakatimizda turizmni rivojlantirish yo‘lida juda katta islohotlar amalga oshirilayotgani, bugungi kunda O‘zbekistonda 45 ta xorijiy davlat fuqarolarining 30 kungacha vizasiz bo‘lish imkoniyati yaratilgani, Prezidentimiz farmoniga ko‘ra yurtimiz madaniy-tarixiy va diniy-ma’naviy merosi va an’analarini o‘rganish uchun tashrif buyuruvchi xorij fuqarolariga 2 oygacha muddat bilan beriluvchi Piligrim visa joriy qilingani haqidagi ma’lumotlar ham xorijiy OAV e’tiboriga etkazildi.Har qalay viloyatimizda ziyorat turizmini eng yuksak pag‘onaga olib chiqish imkoniyatlari bor ekan, ushbu forum soha salohiyatini xalqaro miqyosida keng targ‘ib qilish uchun muhim ahamiyat kasb etadi. Qolaversa, anjuman davomida xorijlik ishtirokchilarining ziyorat turizmini rivojlantirish yo‘nalishidagi eng yaxshi tajribaliri bilan ham o‘rtoqlashildi. Sohaga investitsiyalarni ko‘proq jalb etish, servis xizmatlarini dunyo standartlari darajasiga yetkazish, sayyohlar uchun manzur va jozibador yangi-yangi loyihalarni ishga tushirish davr talabidir.Shu uchun 1-Xalqaro ziyorat turizmi forumida O‘zbekistonni ziyorat turizmining markazlaridan biri sifatida e’tirof etish to‘g‘risidagi Buxoro deklaratsiyasi qabul qilindi hamda turizmni rivojlantirish davlat qo‘mitasi qoshidagi “Milliy RR markazi” DUK hamda “Global Muslim Travelen Index” doirasida “Matta” (Malayziya), “Grescent Rating” (Singapur) assatsiatsiyalari, Jakarta targ‘ibot fondi (Indoneziya) o‘rtasida memorandumlar imzolandi.22-fevralda bo‘lib o‘tgan videoselektorda prezidentimiz Buxoroda o‘tayotgan 1-Xalqaro ziyorat turizmi forumi kelgusida katta samar berishini alohida ta’kidlab o‘tganlari bejiz emas. Bir so‘z bilan aytganda turizm industriyasi mamlakatimiz iqtisodiyotining asosiy ustunlaridan biriga aylanishiga erishmog‘imiz kerak.Forum bizga umid va ishonch baxsh etdi. Ana shunday nurli taassurotlar og‘ushida 1-Xalqaro ziyorat turizmi nihoyasiga yetdi. Endi uning natijalarini vaqt ko‘rsatadi. Mannon Otaboy,BuxDU matbuot kotibi
