2025-yil 17-dekabr kuni Buxoro davlat universitetining “Rektor offisi” xodimlari ishtirokida Raqamli ta’lim texnologiyalari departamentining mas’ul xodimlari tomonidan “Kibermadaniyatni yuksaltirish va kibergigiyenani shakllantirish” mavzusida targ‘ibot-tashviqot uchrashuvi tashkil etildi.
Uchrashuv davomida ishtirokchilarga axborot-kommunikatsiya texnologiyalaridan foydalanishda kiberxavfsizlik qoidalariga amal qilish, shaxsiy va xizmatga oid ma’lumotlarni himoyalash, noma’lum manbalardan kelgan fayllarni ochmaslik, shubhali havolalar orqali tarqatilayotgan fishing hujumlaridan ehtiyot bo‘lish, bank kartalaridan xavfsiz foydalanish, SMS-kodlar va bir martalik parollarni begonalarga bermaslik, shuningdek, noma’lum raqamlardan kelayotgan qo‘ng‘iroqlarga ishonmaslik bo‘yicha batafsil ma’lumotlar berildi.
Shuningdek, ijtimoiy tarmoqlardan mas’uliyatli foydalanish, soxta axborot va kiberfiribgarlik holatlarining oldini olish, xizmat va shaxsiy qurilmalarda axborot xavfsizligini ta’minlash masalalari amaliy misollar asosida tushuntirildi.
Uchrashuv yakunida ishtirokchilarning savollariga mutaxassislar tomonidan atroflicha javoblar berilib, kibermadaniyat va kibergigiyena ko‘nikmalarini kundalik faoliyatda qo‘llash bo‘yicha tavsiyalar berildi. Mazkur tadbir xodimlarning raqamli savodxonligini oshirish hamda axborot xavfsizligini mustahkamlashga xizmat qildi.
