Buxoro davlat universitetida Olimpiada chempionlari - Shahobiddin Zoirov, Abdumalik Xalakov va ikki karra paralimpiya chempioni Sherzod Namozovlar ishtirokida "O‘zbekiston - yoshlar mamlakati" shiori ostida "BuxDU chempionlari va yoshlar" uchrashuvi bo‘lib o‘tdi.
Bugun, 5-noyabr kuni Buxoro davlat universiteti huzuridagi Universal sport majmuasiga Fransiyaning Parij shahrida bo‘lib o‘tgan XXXIII Yozgi Olimpiada o‘yinlarida ishtirok etib, boks bo‘yicha chempionlikni qo‘lga kiritgan Abdumalik Xalakov, Yozgi Olimpiada o'yinlari 2016 oltin medali sovrindori, O'zbekiston iftixori faxriy unvoni sohibi, kogonlik bokschi Shahobiddin Zoirov hamda ikki karra paralimpiya chempioni Sherzod Namozovlar tashrif buyurishdi.
Kiraverishda ularni universitet voleybol (qizlar va yigitlar) jamoasi tantanali tarzda kutib olishdi. Chempionlar BuxDU Jismoniy tarbiya va sport fakulteti talabalari tahsil oladigan Universal sport majmuasini ko'zdan kechirishdi. Ayniqsa, majmuadagi kutubxona va sport zali mehmonlarda ijobiy taassurot qoldirdi.
Shuningdek, tashrif davomida "O‘zbekiston - yoshlar mamlakati" shiori ostida "BuxDU chempionlari va yoshlar" uchrashuvi bo‘lib o‘tdi. Uchrashuvni universitet rektori O.X.Xamidov kirish so'zi bilan ochib berdi. U nutqi davomida talaba-yoshlarga berilayotgan imkoniyatlar hamda sportchi talabalarning yutuqlarini ta'kidlab o'tdi.
Uchrashuv davomida talabalar o'zlarini qiziqtirgan savollarga javob olishdi. Chempionlarning bildirgan fikrlari talabalardagi sportga bo'lgan ishtiyoqini yanada kuchaytirdi va ularga katta motivatsiya bo'ldi.
BuxDU Axborot xizmati
