Bugun, 4-noyabr kuni Buxoro davlat universiteti katta yigʻingohida “Sud va yoshlar uchrashuvi” boʻlib oʻtdi. Uchrashuvda Oliy sud raisining birinchi o‘rinbosari Ikrom Tuxtamuratovich Muslimov, Buxoro viloyat sudi raisi Ro'ziyev Uchqun Xolboyevich, Oliy sud kadrlar boshqarmasi boshligʻi Muhitdinov Muzaffar Raxmatullo oʻgʻli, Buxoro davlat universiteti rektori O.X.Xamidov, universitet rahbariyati hamda talaba yoshlar ishtirok etishdi.
Tadbirni universitetimiz rektori O.X.Xamidov kirish soʻzi bilan ochib berdi. U nutqi davomida BuxDUdagi Yurisprudensiya yoʻnalishi talabalari uchun universitetda yaratilgan imkoniyatlar toʻgʻrisida toʻxtaldi.
Shuningdek, uchrashuv davomida Oliy sud raisining birinchi o‘rinbosari Ikrom Muslimov soʻzga chiqib, bugungi kunda yoshlarga berilayotgan imkoniyatlar toʻgʻrisida alohida toʻxtalib oʻtdi. Shu oʻrinda, zamonaviy texnologiyalar hamda chet tillarini oʻrganish hozirgi kun talabi ekanligini aytdi. Ikrom Muslimov boʻlajak yuristlarga ushbu kasbni mukammal egallash uchun kerakli koʻrsatmalarni berdi. Xususan, Mazkur kasb egasining nutqi ravon va soʻz boyligi koʻp boʻlishi uchun badiiy hamda ilmiy adabiyotlar bilan muntazam tanishib borishi lozimligi aytildi. Shuningdek, Oʻzbekiston Respublikasi Bosh prokuraturasi va Buxoro davlat universiteti oʻrtasida yaqinda tuzilgan hamkorlik memorandumi talaba-yoshlarga ushbu sohani chuqur oʻrganishlari hamda amaliyot olib borishlari uchun imkoniyatlar kaliti ekanligi aytildi.
Uchrashuv davomida talabalar oʻzlarini qiziqtirgan savollarga javob olishdi. Jumladan, Yurisprudensiya yoʻnalishi talabasi Qodirov Nazarbek Tergov sudiyasi faoliyatiga qiziqqanida, Ikram Muslimov ushbu soha haqida toʻla izoh berdi.
Uchrashuv soʻngida Oliy sud raisining birinchi o‘rinbosari Ikrom Tuxtamuratovich Muslimov, Buxoro viloyat sudi raisi Ro'ziyev Uchqun Xolboyevich, Oliy sud kadrlar boshqarmasi boshligʻi Muhitdinov Muzaffar Raxmatullo oʻgʻliga universitetga tashriflari uchun minnatdorchilik bildirilib, kelgusida BuxDU va Sud hamkorligini yanada mustahkamlash to'g'risida kelishib olindi.
