Bugun universitetimizga mashhur olima, Indoneziyaning Gunadarma universiteti rektori, O‘zbekistonning Indoneziyadagi turizm elchisi, BuxDU faxriy professori Eko Sri Margianti tashrif buyurdi.
Eko Sri Margianti mamlakatimizda o‘tkazilgan Oliy Majlis Qonunchilik palatasi hamda viloyat, shahar va tumanlar kengashlariga saylovlar jarayonida xalqaro kuzatuvchi sifatida ishtirok etdi. Saylovlarni o‘tkazish jarayonlariga yuqori baho berish qatorida E.S.Margianti mamlakatimiz oliy ta’lim tizimidagi o‘zgarishlarni ham kuzatib borayotganligini ta’kidlab o‘tdi.
Universitet ofis-registrator markazi faoliyati bilan tanishgan E.S.Margianti Gunadarma universiteti tajribasi bilan ham o‘rtoqlashdi hamda ofis-registrator faoliyatini kengaytirish bo‘yicha tavsiyalarni berdi. Masalan, taklif etilayotgan xizmatlar qatoriga tayanch doktorantlar uchun ham ma’lumotlarni taqdim etishni kiritish maqsadga muvofiqligi ta’kidlandi.
Universitet rektori O.Xamidov bilan uchrashuvda ba’zi bir muhim yo‘nalishlarda amalga oshiriladigan masalalar bo‘yicha kelishib olindi. Xususan, yaqinda Gunadarma universiteti yordamida indonez tili kurslarini tashkil etish, xususan gid-hamrohlarni indonez tilida ham tayyorlash yo‘lga qo‘yiladi.
