Buxoro davlat universiteti Xorijiy tillar fakulteti Germaniyaning Göttingen- George August universiteti bilan 2023-2024 yillar davomida qiymati 180000€ bo’lgan “Muloqotda Yevropa istiqbollari: Markaziy Osiyo va G‘arb tadqiqotlari” DAAD loyihasini amalga oshirmoqda.
Shu o’rinda ta’kidlash joizki, Göttingen universiteti QS universitetlar reytingida 215- o’rinda, THE reytingida 119-o’rinda, Best Global Universities reytingida 163- o’rinda, Germaniya OTMlari reytingida 6-o’rinda turadi.
DAAD loyihasining bosh mavzusi yevropalik sayyohlarning Markaziy Osiyo haqidagi qarashlari va sharqshunoslik masalalaridan iboratdir. Ushbu maqsadlarga turli kurs va seminarlarda ishtirok etish, shuningdek, Buxoro, Samarqand va Berlinga sayohatlar orqali erishiladi.
Loyiha maqsadi ilmiy tadqiqot ko‘nikmalarini oshirish, nemis talabalariga O’rta Osiyo tarixi va madaniyatini o’qitish, o’zbek talabalariga Yevropalik olimlarning O’rta Osiyoga sayohatlari va ular yaratgan sayohatnomalarning lingvistik va badiiy tahlilini o’qitishdan iboratdir.
Xorijiy tillar fakulteti dekani N.B. Ataboyev va Ingliz adabiyotshunosligi kafedrasi dotsenti M.B.Axmedovalar loyiha doirasida amaliy tashrif bilan universitetda bo’lib, fakultetlar doirasida kelishuvlarga erishishdi. Tashrif doirasida, Ijtimoiy fanlar fakulteti dekani prof. Klaus-Peter Horn, Eronshunoslik kafedrari mudiri Dr. Eva Orthman, Lingvistika kafedrasi mudiri Dr. Georg Höhn bilan uchrashuv o’tkazishdi. O’zbekistonda ta’lim tizimining rivoji va ma’naviy-madaniy sohada bo’layotgan o’zgarishlar haqida magistr talabalarga o’quv mashg’ulotlar o’tildi. Tashrif davomida Göttingen universiteti Xalqaro aloqalar bo’limi mudiri va Ingliz tilshunosligi kafedrasi a’zolari bilan uchrashuvlar tashkil qilish rejalashtirilgan.
