Dunyoda ikki qudratli kuch bor – biri qilich, yana biri esa qalam. Ular o‘rtasidagi raqobat va kurash shiddatli. Lekin ulardan ham qudratliroq yana bir kuch bor – bu qo‘liga qalam olgan ayoldir.
Buxoro davlat universitetida bugun katta shodiyona. Qo`liga qalam olib, yurtimiz ravnaqiga hissa qo`shayotgan olima, fozila, mukarrama ayollar, ustozlar va opa-singillar uchun Xalqaro Xotin-qizlar kuni munosabati bilan bayram tadbirlari bo`lib o`tdi.
Bugun Buxoro davlat universitetida bir guruh professor-o`qituvchilar Xalqaro xotin-qizlar kuni munosabati bilan taqdirlandi. Ularning xizmatlari, ilm-fan ravnaqi yo`lidagi fidoiyliklari e'tirof etildi. BuxDU rektori Obidjon Xamidov boshchiligidagi rahbariyat erkaklari ayollarimizga iliq va samimiy dil so`zlarini aytib, Buxoro davlat universiteti kasaba uyushma qo‘mitasi tomonidan tashkillashtirilgan qimmatbaho sovg`alar hamda tashakkurnomalar bilan taqdirlanishdi.
So`ngra, e'tirof namunasi sifatida bayram kechasi uyushtirildi. Xushkayfiyat, zavq va shavq ulashayotgan ushbu tantana shukuhi sabab BuxDUdagi har bir xotin-qizning chehrasida tabassum, ko`zlarida mamnuniyat zohir bo`ldi.
Shodiyona avvalida hunarmandchilik va tasviriy san’at asarlari ko`rgazmasi tashkil etildi. Viloyat Badiiy akademiyasining akademigi rassom – Davron Toshevning shaxsiy ko‘rgazmasi namoyishi bo`lib o`tdi. Bayramga monand hashamatli bezalgan BuxDU faollar yig`ingohida namoyish etilgan “Ayolga ehtirom” nomli video-rolik yig`ilganlarga bayram shukuhini ulashdi. BuxDUning “Zarb” doirachilar guruhining chiqishi hamda BuxDU rektori Obidjon Xamidovning samimiy tabrik so`zlari xotin-qizlarga ko`tarinki kayfiyat bag`ishladi: “Borliq Alloh Taoloning ijodi bo`lsa, bundan keyingi yaratish imkoni ayolga berilgan. Biz har birimizni dunyoga keltirgan zot mushfiq onajonlarimizdir. Shu sababdan har bir muvaffaqiyatimizda ularning hissasini e’tifor etamiz. Ayolning mashaqqati, sabri, bardoshini har qancha e’tirof etsak oz. Bugungi kunda muassasamizning aksariyat kuchi ayollar hisobiga to`g`ri keladi. Buxoro davlat universitetida 23 nafardan ortiq fan doktori, professor, 120 ga yaqin fan nomzodi hamda falsafa doktorlari, 80 dan ortiq dotsentlar, fakultet dekani, 11 nafar kafedra mudiri, bo`lim boshliqlari faoliyat yuritib, muassasa ravnaqiga hissa qo`shishmoqda. Har biringiz jamoamiz hayoti va faoliyatida ham muhim o`rin tutasiz. Universitet salohiyatini yuksaltirish, yangilash, fan va ta’lim sohasidagi yutuqlarimizni jahon andozalari darajasiga ko‘tarish maqsadida boshlagan ezgu ishlarimiz kelgusida biz kutgan amaliy natijalarni berishi uchun siz aziz opa-singillarimizning xizmatingiz benihoya katta.”
Mahoratli raqqosalarning ijrolari, jonli ijrodagi kuy va qo`shiqlar, skripka cholg`usi jo`rligidagi popuri, BuxDU rahbariyati erkaklarining “Muqaddas ayol” qo`shig`i ijrosi yig`ilganlarga manzur bo`ldi.
