Qadrli yoshlar, aziz talabalar!
Bugun kelajak tomon dadil odimlayotgan, yuksak marralarni ko`zlab, ustida tinmay mehnat qilayotgan, ertamiz bunyodkorlari, jigargo`shalarimiz – yoshlar bayramidir. Har biringiz hali to`liq kashf etilmagan, sir-sinoatlari to`la o`zgacha dunyosiz! Beg`ubor va navqiron fasl egalari! Orzu-umidlaringiz, beqiyos imkoniyatlaringizga har birimiz havas qilamiz. Kezi kelganda, sizning shijoatingizdan ilhom olamiz.
Bugun muqaddas vatanimiz - O‘zbekistonimizda erkin va obod, farovon hayot qurish yo‘lida prezidentimiz boshlab bergan ulkan ishlarni davom ettirishga qodir yangi avlod shakllanmoqda. U avlod doim cho`qqilarni ko`zlaydigan, jahon miqyosidagi havas qilsa arziydigan yangiliklarni yurtimizda ham tadbiq etishga bel bog`lagan, istalgan sohada muvaffaqiyat qozonishga layoqatli bo`lib voyaga yetmoqda, faoliyat yuritmoqda. Ana shunday yoshlari bor, ko`p sonli g`ayratli talaba-yoshlarni qamrab olgan Buxoro davlat universitetida yoshlarning qobiliyatlarini yuzaga chiqarish, ularga qulay muhit, yetarli shart-sharoit yaratish borasida salmoqli ishlar olib borilayotganini ular erishayotgan yutuqlarning ko`pligi va xilma-xilligidan bilish mumkin. Biz sizlarni, aziz talaba-yoshlarimizni jismonan ham ma’nan barkamol bo‘lib voyaga yetishingiz uchun bor kuch va imkoniyatlarni safarbar etmoqdamiz. O`z navbatida sizning jonbozligingizni, ijtimoiy faolligingizni minnatdorchilik bilan e’tirof etamiz.
Bugungi kunda Yangi O`zbekiston uchun mas’uliyatli, o`z fikriga ega, intellektual va kreativ, vatanparvar yosh kadrlar davlat va jamiyat boshqaruvida ahamiyatli. Shu ma’noda, siz aziz farzandlarimizdan iltimosimiz, xalqimizning, prezidentimizning, ota-onangiz, sizga umid bilan tikilayotgan yaqinlaringiz ishonchini, ezgu orzu-umidlarini ro`yobga chiqarish uchun halol va vijdonan yashab, taraqqiyot cho`qqilarida ildamlang.
“Yoshlar kuni”da siz aziz talaba-yoshlarga mustahkam sog‘lik, bilim olish, o‘rganish va izlanishdan to‘xtamaslik, eng asosiysi, ota-onangiz, oilangiz, yaqinlaringiz, do‘st, tengdoshlaringiz ishonchini oqlab, ezgu maqsadlaringizga erishishingizda tilakdoshmiz!
Hurmat bilan
Xamidov Obidjon Xafizovich,
Buxoro davlat universiteti rektori,
Iqtisodiyot fanlari doktori, professor
