“Kamolot” YoIH Markaziy Kengashi, Oliy va o’rta maxsus ta’lim vazirligi, O’zbekiston Respublikasining “Iste’dod” jamg’armasi, Fanlar Akademiyasi hamda Fan va texnologiyalarni rivojlantirishni muvofiqlashtirish qo’mitasi bilan hamkorlikda tashkil etilgan anjumanda Buxoro va Navoiy viloyatlaridagi oliy ta’lim muassasalarining yosh tadqiqotchilari, talaba va magistrantlari ishtirok etdi. - An’anaviy tarzda o’tkazib kelinayotgan mazkur anjuman yosh izlanuvchilarning tadqiqotlarini amalga oshirishda yordam beribgina qolmay, ularning har tomonlama tajribalarini oshirishda mahorat maydoni vazifasini o’taydi, - deydi Buxoro davlat universiteti rektori, texnika fanlari doktori, professor Abduqobil To’laganov ochilish marosimidagi tabrik so’zida. Anjumanning yalpi yig’ilishida Buxoro davlat tibbiyot instituti tadqiqotchisi Sh.Ahrorova, Buxoro davlat universiteti katta ilmiy-xodim izlanuvchilari Sevara Nazarova, Oybek Qilichevlar ma’ruza qilib, bugungi kunda iqtidorli yoshlarni qo’llav-quvvatlash borasidagi islohotlar kecha va bugun misolidagi qiyosiy tahlili, Buxoro vohasi tuprog’ida suv tanqisligi muammolari va ularni oldini olish yo’llari borasidagi dolzarb mavzular bo’yicha muhokama yuritishdi.Shundan so’ng anjuman o’z ishini to’rt sho’’ba ijtimoiy-gumanitar fanlar, tabiiy fanlar, aniq fanlar, texnik fanlarga bo’lingan holda olib borib, unda 150 ga yaqin ishtirokchilar o’z ilmiy maqolalari bilan ishtirok etdi. Har bir yo’nalish bo’yicha soxaning etuk mutaxassislaridan iborat hakamlar hay’ati tanlangan ilmiy ishlarning dolzarbligi hamda bugungi kundagi ahamiyatiga qarab saralab olishdi.- Bu yilgi anjumanga “Kichik biznes va xususiy tadbirkorlik faoliyatida zamonaviy marketing kompleksining o’rni” nomli ilmiy maqolam bilan ishtirok etdim, - deydi Ijtimoiy-gumanitar yo’nalishining 2-o’rin g’olibi, BuxDU Ijtimoiy-iqtisodiy fakultet talabasi Muhammadsodiq Hamidov. – O’ylaymanki, ustozlarim ko’magida tayyorlagan bu loyiham bugun jamiyatimizda asosiy kuchga aylanib borayotgan kichik biznesni rivojlantirishda muhim vosita bo’lib xizmat qiladi.Har bir yo’nalishdan uch nafar, jami o’n ikki nafar g’olib anjumanning respublika bosqichida ishtirok etadi.
