Assalomu alaykum, muhtarama ayollar!
Munis opa-singillar!
Kirib kelayotgan bahoriy ayyom, nafosat va nazokat bayrami – Xalqaro xotin-qizlar kuni bilan barcha xotin-qizlarni universitetimiz jamoasi nomidan chin qalbimdan muborakbod etaman.
Ayollarni, qizlarni bahorga qiyoslashadi. Ayolni e’zozlash – bizning millatimiz, xalqimiz uchun oliy qadriyat darajasiga ko`tarilgan fazilat. Ayollarni qancha ulug`lasak, hayotimizning chirog`i, umrimizning bahori, guli deb e’zozlasak, demakki, oilamizni, Vatanimizni e’zozlagan bo`lamiz.
Bu dunyoda shirin va ahil, baxtli hayot uchun poydevor yaratib, insonni inson, oilani mustahkam oila qiladigan, ilmli zurriyotlarni jamiyatga yetkazib beradigan, biz uchun sevgi-muhabbat, vafo va sadoqat timsoli bo‘lib kelayotgan siz, go‘zal va betakror, qadrdon ayollarimiz, desak, also mubolag`a bo`lmaydi.
Mamlakatimizda olib borilayotgan islohotlar ham xalqimiz, avvalo, opa-singillarimiz, munis onaxonlarimiz turmushi farovonligini yanada yuksaltirishga qaratilgandir. Onalik va bolalikni himoyalash, qizlar ta’limiga e’tibor, jamiyatda ayollar rolini oshirish davlatimiz siyosatining ustuvor yo`nalishlaridandir.
Har biringiz jamoamiz hayoti va faoliyatida ham muhim o`rin tutasiz. Universitet salohiyatini yuksaltirish, yangilash, fan va ta’lim sohasidagi yutuqlarimizni jahon andozalari darajasiga ko‘tarish maqsadida boshlagan ezgu ishlarimiz kelgusida biz kutgan amaliy natijalarni berishi uchun siz aziz opa-singillarimizning xizmatingiz benihoya katta.
Yana bir bor qutlug` kun bilan barchangizni samimiy qutlayman. Sizga sihat-salomatlik, oilaviy xotirjamlik, baxt-saodat, yurtimiz obodligi, Vatanimiz ravnaqi hamda xalqimiz farovonligi yo`lida amalga oshirayotgan ezgu ishlaringizda ulkan muvaffaqiyat tilayman.
Hurmat bilan
Obidjon Xafizovich Xamidov,
Buxoro davlat universiteti rektori