Bugun Buxoro davlat universitetiga Turkiya Respublikasi Oliy ta`lim Kengashi raisi Erol O'zvar boshchiligidagi 9 nafar Turkiya oliy ta`lim muassasalari rektorlari tashrif buyurishdi.
Uchrashuv avvalida universitet bosh binosida rektorlar o`zaro suhbat olib borishdi. Shundan so`ng, BuxDU bosh faollar yig`ingohida uchrashuv bo`lib o`tdi.
Uchrashuvni Buxoro davlat universiteti rektori Obidjon Xamidov ochib berdi. Nufuzli turk delegatsiyasining azaldan ilm-ma’rifat o`chog`i bo`lgan Buxoroyi sharifga tashrif buyurganidan mamnunligini bildirdi. Ushbu tashrifni nafaqat Oliy ta’lim muassalari o`rtasidagi, balki ikki mamlakat o`rtasidagi mustahkam aloqalarning poydevori bo`ladi, deya baholadi.
Uchrashuvda so`zga chiqqan Turkiya Respublikasi Oliy ta`lim Kengashi raisi, professor Erol O‘zvar ”Turklarning ota yurti bo`lgan Buxoroda sizlar bilan diydorlashayotganimizdan benihoya mamnunmiz. O`ylaymizki, ushbu hamkorlik Oliy ta’lim muassalari o`rtasidagi sog`lom raqobatgina emas, balki ikki davlat o`rtasidagi munosabatlarni mustahkamlovchi ko`prik bo`la oladi. Mqasadimiz faqat mavjud OTMlar bilan hamkorlik aloqalari emas, balki o`zbek-turk nomi bilan ataladigan universitet ta’sis etish niyatidamiz. Ushbu xayrli masalada O`zbekiston Oliy va o`rta maxsus ta’lim vazirligi bilan muzokaralar olib bordik. Kelgusi safar o`qituvchilar hamda talabalar bilan ham mana shunday uchrashuv o`tkazish orzusidamiz. Bu muzokaralar qog`ozda qolib ketishini istamagan holda yuksak natija berishiga ishonamiz, “ – deya mulohazalarini o`rtoqlashdi.
Ma’lumot o`rnida aytish joizki, ushbu tashrifdan maqsad O`zbekistondagi Oliy ta’lim muassalari bilan ilm-fan yo`nalishlarida muzokaralar olib borish hamkorlikda hamda Turkiya va O`zbekiston hamkorligidagi universitetni tashkil etishdan iborat.
Uchrashuv davomida Oliy ta’lim muassalarining taqdimotlari taqdim etildi. Qatnashuvchilar o`zlarini qiziqtirgan savollarga javob olishdi. Yakunda o`zaro muzokaralar olib borilar ekan, Turkiya delegatsiyasiga esdalik sovg`alari berildi.
