Buxoro davlat universitetining tabiiy fanlar hamda ijtimoiy-iqtisodiy fakultetlarida ta’lim olayotgan 1700 nafar talaba zamonaviy qulayliklarga ega bo’ldi. Yaqinda ular tahsil ko’rayotgan 2-o’quv binosi mukammal ta’mirlanib, foydalanishga topshirildi. Shu munosabat bilan bu yerda tantanali marosim bo’lib o’tdi.Tadbirda viloyat hokimi Muhiddin Esanov so’zga chiqdi. Viloyat rahbari mamlakatimiz Prezidentining rahnamoligida ta’lim tizimini isloh qilish, uning moddiy-texnika bazasini mustahkamlashga katta e’tibor qaratilayotgani, viloyatimiz oliy o’quv yurtlari, jumladan, Buxoro davlat universitetida ham amalga oshirilayotgan bunyodkorlik ishlari ana shu g’amxo’rlikning yaqqol namunalaridan biri ekanligini ta’kidladi.Tantana ishtirokchilari o’quv binosida yaratilgan zamonaviy sharoitlar bilan tanishdilar.Umumiy loyiha-smeta qiymati 6 milliard 70 million so’mlik bo’lgan mukammal-ta’mirlash ishlari bosh pudratchi "Kogonneftegazinvest" mas’uliyati cheklangan jamiyati quruvchilari tomonidan amalga oshirildi. Bundan 43 yil ilgari barpo etilgan binoning ichkari va tashqi qismlari yangi qiyofaga ega bo’ldi. Muhandislik-kommunikatsiya tizimlari yangilandi. O’lchamlari va boshqa ko’rsatkichlari davlat ta’lim standartlariga javob beradigan o’quv xonalari yangi mebellar bilan ta’minlandi. Yaqin orada o’quv laboratoriyalari ham eng zamonaviy tegishli asbob va jihozlarga ega bo’ladi.Bu kabi qulayliklar ta’limni axborot va ilg’or pedagogik texnologiyalardan foydalangan holda olib borish imkoniyatlarini kengaytiradi.Universitetda bunyodkorlik ishlari 2013 yilda boshlangan bo’lib, 1100 o’rinli 4 ta talabalar turar joyi ta’mirlangan edi. Hozirda esa yana bir inshoot—bosh o’quv binosida bunyodkorlik ishlari davom etmoqda.Manba: buxoro.uz
