Respublika miqyosidagi ushbu ilmiy-amaliy anjumanni BuxDu rektori Obidjon Xamidov kirish so`zi bilan boshlab, ishtirokchilarga muvaffaqiyat tiladi. Agrar tarmoqqa innovatsiyalarni keng tatbiq qilish, zaminimizda yetishtirilayotgan xom ashyoni o‘zimizda qayta ishlashni chuqurlashtirish bugungi zamon talabi hisoblanadi. Zero, qishloq xo‘jaligi qanchalik sanoatlashsa, davlatning iqtisodiy va eksport salohiyati shunchalik ortadi, aholi turmush farovonligi yuksaladi. Shu bois O‘zbekistonda keyingi paytlarda ilg‘or texnologiyalarga asoslangan infratuzilmani yaratish, qishloq xo‘jaligida klaster usulini joriy etishga jiddiy e’tibor qaratilmoqda. Ana shunday innovatsion loyihalardan biri Buxoro viloyatida ro‘yobga chiqarilmoqda.Qishloq xo’jaligida klaster tizimini rivojlantirish natijasida qo‘lga kiritilgan yutuqlar, amalga oshirilayotgan tajribalar, mavjud muammolar va ularning innovatsion yechimlarini ishlab chiqish bo‘yicha ilmiy-amaliy takliflar taqdim qilishni nazarda tutgan ushbu ilmiy-amaliy anjumanga jami 100 ta ma’ruza qabul qilingan. Unda Respublikamizning turli hududlaridan, jumladan, O’zbekiston Respublikasi Fermerlar kengashi raisi, qonunchilik palatasi deputati Xaitov Aktam Axmadovich, Buxoro tumani "Madaniyat Muxammad Ismat" fermer xo‘jaligi rahbari M.I. Axmedov, Qarshi muhandislik iqtisodiyot instituti, Toshkent davlat agrar universiteti, Urganch davlat universiteti, Qishloq xo‘jaligi iqtisodiyoti ilmiy tadqiqotlar instituti va boshqa oliy ta’lim muassasalari va ilmiy tadqiqot institutlari pedagog-xodimlaridan ma’ruzalar qabul qilindi. Anjumanda professor-o‘qituvchilar bilan bir qatorda Buxoro Cotton Agro Klaster direktor o‘rinbosari A.A. Xasanov, Shofirkon tumanidagi “Buxoro Zarxal teks” MChJ paxta-to‘qimachilik klasteri rahbari D. M. Bobojonov ham qatnashishdi. Shuningdek, mazkur anjumanning nufuzini oshirgan Vengriya qishloq xo‘jaligi va hayot fanlari universiteti tadqiqotchisi I.Erdonovning onlayn shakldagi ishtiroki yig`ilganlarda o`zgacha taassurot qoldirdi.BuxDU Mabuot xizmati