“O`zbekiston fiziklar kengashi”ning raisi, atoqli shoir va yozuvchi akademik G`afur G`ulomning o`g`illari, taniqli olim Qodir G‘ulomov hamda professor, O`zR.FA akademigi Komil Muqimovlar BuxDU Fizika kafedrasi professori, pedagogika fanlari doktori Siddiq Qahhorov hamrohligida Buxoro shahridagi 12-son Fizika va matematikaga ixtisoslashtirilgan davlat umumta’lim maktabiga tashrif buyurishdi. “Uch avlod uchrashuvi” doirasida tashkillashtirilgan ushbu tashrif bir necha kundan buyon davom etayotgan uchrashuvlarning davomi bo`ldi.Mehmonlar o`qituvchi hamda o`quvchilarga o`zlarining ilm yo`llari, hayotlarida sodir bo`lgan ibratli va yorqin xotiralaridan aytib berishdi. Ilm-ma’rifatning qiymati, adabiyot hamda aniq-fanlar haqidagi mulohazalari bilan o`quvchilarning ilm-fanga qiziqishlarini oshirishdi. Bunga javoban o`quvchilar atoqli akademik shoirimiz G`afur G`ulom ijodidan yodlangan she’rlarini ijro etib berishdi. Samimiy suhbat orasida maktabning 10 nafar kitobxon o`quvchisiga “365 kunga 365 ibratli hikoya” kitobini tuhfa etishdi. Uchrashuvdan so`ng mehmonlar Buxoroyi sharifning Eski shahar hududiga sayohat uyushtirishdi. Ark qo`rg`oni, Minorayi kalon majmuasi, Miri Arab madrasasi kabi bir qator qadimiy mahobatli binolar bilan tanishishdi.BuxDU Matbuot xizmati
