Kuni kecha BuxDUda “Hindiston madaniyati kuni” o‘tkazildi. Xindistonning Toshkentdagi elchixonasi, Lal Baxadur Shastri nomidagi Xindiston madaniyati markazi direktori professor Chandr Shekxar, Dehli universiteti professori Nilima Astana, Hind falsafasi mutaxassisi Prasobh Nano kabi mehmonlar universitetga tashrif buyurishdi. Mehmonlar BuxDU rektori professor O.Xamidov, Xalqaro hamkorlik bo‘limi boshlig‘i M.Qilichev bilan uchrashib, Hindiston OTMlari bilan hamkorlik doirasini kengaytirish, BuxDUga Hindistondan ingliz tili va informatsion texnologiyalar bo‘yicha mutaxassilarni ishga taklif qilish, hind madaniyati bilan bog‘liq tadbirlarni tashkil etish kabi masalalar borasida muloqot olib borildi. Shundan so‘ng, Buxoro davlat universiteti Xorijiy tillar fakulteti dekani f.f.d., dotsent M.M. Jo‘rayeva, Ingliz adabiyoti kafedrasi mudiri f.f.n. H.O‘. Yusupova, Ingliz adabiyetshunosligi kafedrasi mudiri f.f.f.d. O.M. Fayzullayev, Ingliz adabiyoti va stilistika kafedrasi dotsenti f.f.f.d. F.M. Xajiyeva, Ingliz adabiyotshunosligi kafedrasi dotsenti f.f.f.d. M.B. Axmedova, Ingliz tilshunosligi kafedrasi tayanch doktoranti M.U.Saidova kabi professor o‘qituvchilar boshchiligida Hindiston madaniyati bilan bog‘liq tadbirlar o‘tkazildi. Dastlab, Xorijiy tillar fakulteti talabalari bilan hind falsafasida, keng ma’noda ma’naviy, ruhiy va jismoniy amaliyot hamohangligini bildirib, insonning psixik va fiziologik funksiyalarini boshqara olish qobiliyatini rivojlantirishga qaratilgan yoga mashqlari o‘tkazildi. Yoga mashg‘ulotlarning ertalabki qismi soat 7:00da ko‘hna Buxoroning “Ark” qal’asi oldida, ikkinchi qismi soat 10:00da BuxDU sport zalida olib borildi. Shundan so‘ng, Tarix fakulteti professor-o‘qituvchilari va talabalariga professor Chandr Shekxar tomonidan “Hindiston tarixi va madaniyati” mavzusida, Xorijiy tillar fakulteti talaba-yoshlariga prof. Nilima Astana tomonidan “Zamonaviy onlayn o‘qitish metodlari” mavzularida ma’ruzalar o‘qildi. Tadbir so‘nggida Xorijiy tillar fakulteti qator professor-o‘qituvchilari bilan mehmonlar o‘rtasida davra suhbati o‘tkazildi, o‘qitishda yangi yondashuvlar, yoganing mohiyati va ahamiyati to‘g‘risida muloqot olib borildi. Hindistonlik mehmonlarga o‘zbek milliyligini bildiruvchi ramziy sovg‘alar taqdim etildi.BuxDU Matbuot xizmati