Assalomu aleykum, muhtarama ayollar, munisa hamkasblar!Ayol – nafosat va go‘zallik timsoli. Uning mehridan qalblar sururga to‘ladi. Ayollarning jamiyatdagi mavqei haqida so‘z ketganda, ko‘z o‘ngimizda To‘maris, Bibixonim, Nodirabegim, Uvaysiy kabi buyuk siymolar gavdalanadi. Ularning hayot yo‘li, dunyoqarashi, mavqei asrlar davomida yurtimiz ayollarining chinakam timsoli bo‘lib kelayotir. Bugun bu hurmat va e’tibor davlat siyosati darajasiga ko‘tarildi. Xotin-qizlar huquqlarini himoya qilish, ularga qulay mehnat sharoitlarini yaratish, mehnatlarini munosib rag‘batlantirish borasida olib borilayotgan ishlar e’tirofga sazovor. Birgina iqtidorli qizlarimiz uchun ta’sis etilgan Zulfiya nomidagi davlat mukofoti ko‘plab iste’dodli qizlarimizni yangi marralar sari yetaklamoqda. Ingliz tilshunosligi kafedrasi 3-bosqich tayanch doktoranti Xolikova Nozima Nematilloyevna 2020 yilda “Zulfiya” nomidagi davlat mukofotiga sazovor bo‘ldi. Joriy yilda ushbu mukofotga sazovor qizlar orasida universitetimiz “San’atshunoslik” fakulteti talabasi Dinara Umarqulovaning ham borligi barchamizni quvontirdi. Yana bir quvonchli tarafi shundaki, universitetimiz olimasi, fidoiy ustozi, Oliy majlis Senati a’zosi Xusenova Abira Amanovna mamlakatimizning yuksak darajadagi unvoni – “Do‘stlik ordeni ” taqdirlandilar.Respublikada iqtisodiy tarmoqlar va ijtimoiy sohani jadal rivojlantirish, ilmiy intellektual hamda moliyaviy resurslarni to‘liq safarbar etgan holda, ilmiy-innovatsion salohiyatdan keng foydalanish, istiqbolda ilm-fanni muntazam isloh qilib borishning ustuvor yo‘nalishlarini belgilash, zamonaviy bilimga ega mustaqil fikrlaydigan, yuqori malakali kadrlar tayyorlash, ilmiy infratuzilmani modernizasiya qilish ishlarini sifat jihatdan yangi bosqichga ko‘tarish, shuningdek, prezidentimiz Sh.M. Mirziyoyev ta’kidlaganlaridek, taraqqiyotning tamal toshi ham, mamlakatni qudratli, millatni buyuk qiladigan kuch ham bu – ilm-fan, ta’lim va tarbiyadir. Ertangi kunimiz, vatanimizning yorug‘ istiqboli, birinchi navbatda, ta’lim tizimi va farzandlarimizga berayotgan tarbiyamiz bilan chambarchas bog‘liq. Ilm-fan rivoji hamda ta’lim-tarbiya borasida universitetimizda ham bir qator tayanch doktorant (PhD)lar hamda doktorant (DSc)lar samarali faoliyat olib bormoqda.Oliy ta’limdan keyingi ta’lim instituti tayanch doktorantura (PhD)da 137 nafar va doktorantura(DSc)da 7 nafar ilmiy izlanuvchilar faoliyat olib bormoqda. Shundan 69 nafari ayollarni tashkil etadi. Jumladan, 42 nafar 1-bosqich, 14 nafar 2-bosqich, 13 nafar 3-bosqich tayanch doktorant(PhD)lar hamda 5 nafar 1-bosqich doktorant(DSc)lar faoliyat ko‘rsatib kelmoqda. 4 nafar tayanch doktorant(PhD)lar muddatidan oldin falsafa doktori (PhD) doktorlik dissertasiyasini muvaffaqiyatli himoya qildi hamda O‘zbek tilshunosligi kafedrasi 1-bosqich tayanch doktoranti Axmedova Dildora Baxodirovna, Ingliz tilshunosligi kafedrasi 3-bosqich tayanch doktoranti Xolikova Nozima Nematilloyevnalarga O‘zbekiston Respublikasi Vazirlar Mahkamasining 2020 yil 6 noyabrdagi 696-sonli qarorining 16-bandiga asosan rektor buyrug‘i bilan o‘qish muddatining qolgan davri uchun ko‘zda tutilgan tegishlicha stipendiya miqdori hajmida mukofot berildi. O‘zbek tilshunosligi kafedrasi tayanch doktorantlari Gʻaybullayeva Nafisa Izatullayevna, Gulyamova Shaxnoza Qaxramonovnalar hamda ularning ilmiy rahbarlari universitet jamoa shartnomasining tegishli bandlari asosida moddiy rag‘batlantirildi. 2 nafar tayanch doktorantlarimiz esa O‘zbekiston Respublikasi Prezidenti davlat stipendiyasi tanlovining yakuniy bosqichigacha faol ishtirok etdi. Yurtboshimizning «Ayolni e’zozlash, ayolga ehtirom ko‘rsatish xalqimizga xos oliyjanob qadriyat hisoblanadi. Biz, barchamiz qanday kasb, qanday lavozimda ishlamaylik, qalbimiz, yuragimizdagi jamiki ezgu fazilatlar uchun siz, mehribon ayollardan umrbod qarzdormiz», – degan ta’kidlari barchamizning ko‘nglimizdagi e’tirofdir. Shu o‘rinda men Universitetimiz xotin – qizlarining jismoniy madaniyat xamda aholi salomatligini yuksaltirishdagi faol ishtiroklarni alohida ta’kidlab o‘tgan bo‘lar edim. Jismoniy madaniyat fakultetida jami 12 nafar ayol professor – o‘qituvchi hamda 378 nafar talaba qizlar tahsil oladi. 12 nafar professor-o‘qituvchining 2 nafari sport ustasi, 6 nafari sport ustaligiga nomzod, bir nafari fan olimpiadasi sovrindori. Fakultet talaba qizlari o‘quv mashg‘ulotlari bilan bir qatorda universitet, viloyat, respublika hamda xalqaro nufuzli musobaqalarda sport turlari bo‘yicha faol ishtirok etib kelmoqdalar.Hozirgi kunda 100 ga yaqin O‘zbekiston chempioni, 20 dan ortiq xalqaro musobaqalar sovrindorlari, 5 nafar Osiyo va jahon birinchiligi sovrindorlari, 1 nafar “Zulfiya nomidagi Davlat mukofoti” sohibasi tahsil olmoqda. Talaba qizlarimiz 2020-2021 o‘quv yilining o‘zida ko‘plab musobaqalarda nafaqat universitet balki yurtimiz bayrog‘ini yuqoriga ko‘tarib kelmoqdalar.Jumladan: talabalar o‘rtasida o‘tkaziladigan universiada sport musobaqalarida dyudo sporti bo‘yicha 1 ta oltin medal, milliy kurash sporti bo‘yicha 1 ta oltin medal, stol tennisi sport turidan 1 ta bronza medallarini qo‘lga kiritgan bo‘lsalar, O‘zbekiston chempionatlarida qilichbozlik sport turi bo‘yicha 1 ta oltin 1 ta kumush medal, erkin kurash sport turi bo‘yicha 1 ta oltin, Turon kurashi sport turidan 3 ta oltin, 3 ta kumush, 1 ta bronza medal, badiiy gimnastika sport turi bo‘yicha 4 ta oltin medal, chim-ustida xokkey sport turi bo‘yicha umumjamoa hisobida oltin medal, boks sport turi bo‘yicha 2 ta oltin 1 ta kumush medal, xalqaro sport musobaqalarida boks sport turi bo‘yicha 1 ta kumush medallarini qo‘lga kiritdilar. Davlatimiz rahbari xotin-qizlar faolligini yanada oshirish, ularning mavqeini yuksaltirish, huquqlarini har tomonlama himoyalash, jamiyatda o‘zining munosib o‘rniga ega bo‘lishi uchun zarur ijtimoiy, siyosiy-iqtisodiy shart-sharoitlarni yaratish masalasiga doimiy e’tibor berib kelmoqda. Ularga berilgan yangicha imkoniyatlar, imtiyozlar ularning ijtimoiy hayotdagi mavqeini yanada oshirganligini ko‘rishimiz mumkin. Ana shunday ayollar bugun tuman, viloyatni boshqarmoqda. Ayollar orasida senat azosi, deputatlarning borligi, bugun siyosat darajasiga ko‘tarilgan “Ayollar daftari”ning yuritilishi va shu sabab hayotda o‘rnini topib, bugun jamiyat rivoji, o‘zi kabi ayollarning farovon hayot tarzi uchun o‘z hissasini qo‘shmoqda.Olima ayollarning olib borayotgan ilmiy izlanishlari bugun mamlakatimizda yosh avlodning tarbiyasi va yurtimizda fan va madaniyat, ma’naviyat targ‘iboti siz va bizning hayotimizda o‘zining amaliy natijasini ko‘rsatmoqda.Ayolni ulug‘lash – oilani, hayotni, Vatanni ulug‘lash demakdir. Ayollarga berilgan imtiyozlar borasida gap ketganda, yurtboshimiz tashabbuslari bilan kam ta’minlangan oila qizlariga oliy ta’lim muassasalarida o‘qish uchun 2000 ta davlat granti ajratilganligini alohida ta’kidlash joiz. Bu imkoniyat tufayli qanchadan-qancha qizlarimiz o‘z orzulariga erishdilar.Aziz ayollar barchangizni bugungi nafosat va go‘zallik bayrami bilan chin qalbdan tabriklaymiz. Siz borki, oilamizda qut – baraka, fayz bor, siz borki, hayot davom etmoqda, Sizni qancha sharaflasak, qadringizni qancha yuksakka ko‘tarsak, biz avvalo o‘zimizni ulug‘lagan bo‘lamiz, hayotni, yashashni, insoniyligimizni ulug‘lagan bo‘lamiz, bu ikki dunyomiz obod bo‘lishiga kafolatdir! Sizga bayram muborak, ey ta’rifi ulug‘ sig‘mas muhtaram ayollar! Hurmat bilan,Buxoro davlat universiteti rektori,iqtisodiyot fanlari doktori, professor Obidjon Xamidov