O‘zbekiston Respublikasi Prezidenti Shavkat Mirziyoev raisligida 19 yanvarь kuni ma’naviy-ma’rifiy ishlar tizimini tubdan takomillashtirish, bu borada davlat va jamoat tashkilotlarining hamkorligini kuchaytirish masalalari bo‘yicha videoselektor yig‘ilishi o‘tkazildi.So‘nggi yillarda bu borada qator qarorlar qabul qilindi. Respublika ma’naviyat va ma’rifat kengashi raisi Prezident ekani belgilab qo‘yildi. Kengashning hududiy bo‘limlariga mas’ullik hokimlar zimmasiga yuklatildi. Bu o‘zgarish ma’naviy-ma’rifiy ishlarni davlatimiz siyosatida yanada yuksak o‘ringa ko‘tardi.– Agar jamiyat hayotining tanasi iqtisodiyot bo‘lsa, uning joni va ruhi ma’naviyatdir, – dedi Shavkat Mirziyoev yig‘ilishda. – Biz yangi O‘zbekistonni barpo etishga qaror qilgan ekanmiz, ikkita mustahkam ustunga tayanamiz. Birinchisi – bozor tamoyillariga asoslangan kuchli iqtisodiyot. Ikkinchisi – ajdodlarimizning boy merosi va milliy qadriyatlarga asoslangan kuchli ma’naviyat.Hazrat Navoiy inson umrini fasllarga mengzaydilar. Bolalikni – “G‘aroyib us-sig‘ar”ni bahorga, yoshlikni – “Navodir ush-shabob”ni yozga, o‘rta yoshlikni – “Badoe’ ul-vasat”ni kuzga, keksalikni – “Favoyid ul-kibar”ni qishga o‘xshatganda bobokalonimiz haq edilar. Yoshlik bunyodkorlik, go‘zallik, jo‘shqinlik, mehr-muhabbat, yaratuvchanlik demakdir. Yoshlarni to‘g‘ri yo‘lga boshlay olgan davlat – qudratli, bunday mamlakatning kelajagiga ishonch bilan qarash imkoni bor.Bugun dunyo yoshlar tarbiyasidan, ma’naviyatidan shikoyatlanib turgan pallada bizning yoshlar tinim bilmay o‘qimoqda, izlanmoqda. Eng muhimi, Vatan taqdiriga befarq emas. Bugun bizning yoshlarimiz dunyo yoshlari bilan har jihatdan bellasha oladigan bilimga, zakoga, farosatga sohibdir. O‘z tili va adabiyoti bilan bir safda chet tillarni atroflicha o‘rganmoqda. Texnika bilan tillashib, bu boradagi salohiyati bilan barchamizning olqishimizga sazovor bo‘layotgani rost. Biz ularning yoshida qonunni, iqtisodni, siyosatni ular darajasida bilmasdik. Shodlansak arziydigan jihat shuki, yoshlar o‘z haq-huquqlarini biladi. Asriy qadriyatlarimizga cheksiz muhabbat bilan munosabatda bo‘lmoqda. Ammo, ta’kidlash joizki, bunga osonlikcha erishilgan emas. Davlatimiz, Prezidentimiz rahnamoligida ustozlar, mahalla-ko‘y, ommaviy axborot vositalari kabi o‘nlab kuchlar ta’sirida bunday quvonarli holat yuzaga keldi. Uzoqqa bormaylik, bundan 4-5 yil muqaddam kitobxonlik susayib qolgan edi. Bugun yoshu-keksa birday kitobxon. Ota-onalar bolalariga kitob sovg‘a qila boshladi. Ezgulikka yo‘g‘rilgan kitob yoshlarni kamolot sari boshlashi tabiiy. Lekin bu hali ilk qadamlar. Endi badiiy asar mohiyatini teran anglashni o‘rgatishimiz darkor. Buning uchun adabiyotshunosligimiz ravnaq topishi, bunga mos sharoit yaratilishi kerak.Bugun o‘nlab, hatto yuzlab tanlovlar o‘tmoqda, yoshlar faol. Yoshlarimiz ma’naviyatli, mehnatkash, qobiliyatli. Shunchaki e’tirof uchun jumlalar tuzsam, mulohazalarimning ahamiyati sustlashar, nazdimda. Ayrim fikrlarimni bildirmoqchiman.Yutuqlarimiz mo‘l-ko‘l bo‘lsa, hammasi ajoyib ekan-da?! Yo‘q, afsus! Hali qilinishi lozim bo‘lgan ishlar behisobligidan tashqari kamchiliklarimiz oshib-toshib yotibdi. Yoshlar orasida tarbiyasi talabga javob bermaydigani, ma’naviyati sustlari topiladi. “Birniki – mingga, mingniki – tumanga”, – deydi dono xalqimiz. Tarbiyasi bo‘shlar – ko‘nglimizning yarasi. Yara davolanmasa, gazak olishi tabiiy. Yoshlarning barchasi birday komil bo‘lishi uchun nima qilish zarur?! Yoshlar misoli nihol. Kuchli shamol qaysi tomonga qarab essa, nihol o‘sha tomonga egiladi. Kuchli shamol, avvalo, atrof-muhit, biz kattalar. O‘zimiz o‘rnak bo‘lsak, yoshlar tezroq ergashadi. Ota sigaret cheksa, ichsa-yu, o‘g‘liga ichmaslik, chekmaslik zarurligini uqtirsa. Axir o‘gitning kuchi qirqiladi-ku! Demak, avvalo, tarbiyachining o‘zi tarbiyalangan, ilmi bilan amali bir bo‘lishi lozim. Bu juda muhim! Biz qizlar tarbiyasi haqida ko‘p fikr yurtimoqdamiz. Aslida ishni yigitlar tarbiyasidan boshlash, yana ham aniqrog‘i, qizlar va yigitlar tarbiyasini bir-biriga bog‘liq tarzda amalga oshirish darkor.Ikkinchidan, yoshlarning iqtidorini baholashda adolat mezonidan og‘ishmaslik shart. Ularni rag‘batlantirish hammasidan muhim. Bu davlatimiz, davlatboshimiz diqqat markazida turgan masala. Har birimiz amal qilmasak, yoshlarni qo‘llab-quvvatlamasak, ularning ta’lim-tarbiyasi bilan shug‘ullanmasak, boshlangan juda jiddiy chora-tadbirlar natijasiz bo‘lib qolishi mumkin. Yoshlar bekor qolmasligi, ular ta’lim olish bilan birga hunarli bo‘lishi shart. Bu jihat Prezidentimiz tomonlaridan alohida ta’kidlandi. Endi mukammal, atroflicha, oxirigacha o‘ylab tuzilgan dastur zarur. Har bir hududda alohida hunarlar bor. Avval shu hunarmandlar oylik asosida maktabda yoshlarga hunar o‘rgatishi, so‘ng tizimli tarzda oliy ma’lumotli pedagog-hunarmandlar avlodi shakllantirilishi zarur. O‘rgatiladigan hunar kelajakda yoshlarga oilani boqadigan darajada ahamiyatli bo‘lishi darkor.Prezidentimiz ta’limda uzilib qolgan asosiy zanjir bog‘cha ekanini ta’kidlab, bu boradagi muhim chora-tadbirlarni belgilab berdilar. Shundan keyin uchinchi Renesans haqida so‘z ochdilar. Bu – yoshlar uchun zarur motivatsiya. Yoshlar forumi ana shu motivatsiyaga kuch-quvvat bag‘ishladi. Dunyo pandemiya bilan yuzma-yuz, nochor turgan kunlarda mamlakatimizda ma’naviyatga, ma’rifatga, ilmga e’tiborning kuchaygani xayrlidir. Bu og‘ir sinovlardan o‘tishning o‘ziga xos, betakror yo‘li, nazdimizda. Biz ustozlar elimiz yana daholarni oq yuvib, oq taraydigan kunlar kelishi uchun bor salohiyatimizni sarflaymiz! Zotan, ilm-ma’rifatli, hunarmand yoshlarga kelajakni ishonsa bo‘ladi. Satrlarim bu ishonchimni dalillasinlar:Bir yoshlarki, sira olmas tin,Dilida cho‘g‘, ko‘zida yolqin,Bir yoshlarki, qudratli to‘lqin,Daryo xalqim, to‘lqiningni tut,Undan buyuk bunyodkorlik kut.Bir yoshlarki, bag‘rida olam,Yaratmoqlik ishqidan bardam,Hali faxr qiladi Odam,Dunyo xalqim, omon-omonlik,Bu yoshlardan qochsin yomonlik.Ko‘ksing sitib silqiyotgan qon,Sen elkalab kelgan ulug‘ shon,Asriy zafar, ming yillik armon,Illo, xalqim, yoshlarga saboq,Boq, bo‘lajak daholarga boq! Laylo Sharipova, BuxDU dotsenti, f.f.d., shoira.