Butun dunyoda yuzaga kelgan epidemiologik vaziyat ko‘p jabhalarni isloh qilish zaruratini yuzaga keltirdi. Imkon qadar tezroq zamonga moslashishga, barcha tizimda raqamlashtirish ishlarini yo‘lga qo‘yish, onlayn formatda ishlashga ehtiyoj kuchaydi. Sohalardagi kamchiliklar ko‘zga tashlanib, ularni zudlik bilan bartaraf etish zarurati tug‘ildi. Muhimi, yurtboshimiz boshchiligida to‘g‘ri tanlangan strategiya sabab aholi vahimaga berilib, tushkunlikka tushmadi. Har qachongidan-da jipslashib, yakdil xalq bo‘lishimiz kerakligini angladik. Xatolarimizni, oqsayotgan jihatlarimizni teran mushohada qilish imkoniga ega bo‘ldik. Hukumatimiz oliy taʼlimni rivojlantirish, OTMlarni raqobatbardoshligini oshirib, nufuzli xalqaro reytinglarga kiritish, tizimga xalqaro standartlarni joriy qilish, ilmiy-tadqiqot va ishlab chiqarish integratsiyasini yaxshilash, ilm-fan va taʼlimga innovatsiyalarni keng joriy etish bo‘yicha keng ko‘lamli islohotlarni amalga oshirmoqda. Ayniqsa, muhtaram Prezidentimizning 08.10.2019 yildagi PF-5847-sonli “O‘zbekiston Respublikasi oliy taʼlim tizimini 2030 yilgacha rivojlantirish konsepsiyasini tasdiqlash to‘g‘risida”gi Farmonlari bizning yaqin istiqbolda amalga oshirishimiz lozim bo‘lgan vazifalarni aniq ko‘rsatib berdi. 2020-yilning 7-avgust kuni Buxoro davlat universitetida Zoom platformasi orqali yangi o‘quv yili oldidan amalga oshirilishi bo‘yicha ustuvor vazifalar to‘g‘risida universitetning rahbar xodimlari va professor-o‘qituvchilari bilan onlayn yig‘ilish o'tkazildi. Ushbu online yig'ilishda Buxoro davlat universiteti rektori, iqtisodiyot fanlari doktori, professor Obidjon Xamidov, universitet prorektorlari, fakultet dekanlari, bo'lim boshliqlari, universitet kasaba uyushmasi raisi, kafedra professor-o'qituvchilari qatnashdilar. Ushbu yig'ilishni BuxDU rektori Obidjon Xamidov kirish so'zi bilan ochib berdi. Pandemiya hukm surib turgan so‘nggi oylarda ham professor-o‘qituvchilarimiz, talabalarimiz bir qancha yutuqlarga erishishdi. Shulardan talabalarning respublika Fan olimpiadasida universitetimiz professori Sh.Olimov rahbarligidagi talabalarning muvaffaqiyatli ishtirok etib, pedagogika yo‘nalishida 3 ta sovrinli o‘rinni ham qo‘lga kiritganliklari, fizika-matematika fakulteti 4-bosqich talabasi Sobir Boymurodovning nufuzli IMC (Internationale Matematical Competition) xalqaro matematika olimpiadasida munosib ishtirok etib, kumush medal sohibiga aylanganligi, aynan shu talabaning ilmiy raxbari, fizika-matematika fanlari nomzodi, dotsent T. Rasulovning ham ilmiy, ham pedagogik faoliyatda samarali mehnat qilayotganligi, uning nufuzli xorijiy ilmiy jurnallarda chop etayotganligi asosida yuqori Xirsh indeksiga erishganligini bugun eʼtirof qilishimiz lozim. Buxoro davlat universitetda 2020 yil 1 apreldan boshlab 47 ta bakalavriat taʼlim yo‘nalishi, 24 ta magistratura mutaxassisligi hamda 7 ta taʼlim yo‘nalishida qo‘shma taʼlim dasturda tahsil olayotgan talabalar uchun masofaviy taʼlim tashkil etildi. “Raqamli turizm” magistratura mutaxassisligi talabalari (18 nafar) Indoneziyaning Gunadarma universitetining masofaviy taʼlim platformasida tahsil oldi. Moodle platformasida 2019/2020 o‘quv yilida o‘qitiladigan fanlardan 1500 dan ortiq kurslar yaratildi, 890 nafar kurs yaratuvchi professor-o‘qituvchi va barcha kunduzgi taʼlim yo‘nalishi bo‘yicha tahsil olayotgan talabalar (13434 nafar, jumladan 11062 nafar bakalavriat, 359 nafar magistratura, 213 nafar qo‘shma taʼlim dasturlari) biriktirildi. 2019/2020 o‘quv yilida universitet professor-o‘qituvchilari tomonidan yaratilgan 7 nomdagi darslik, 74 nomda o‘quv qo‘llanmaga Oliy va o‘rta maxsus taʼlim vazirligi huzuridagi Oliy va o‘rta maxsus, kasb-hunar taʼlim yo‘nalishlari bo‘yicha o‘quv-uslubiy birlashmalar faoliyatini muvofiqlashtiruvchi kengash qarori asosida mualliflik guvohnomalari berildi.BuxDU Matbuot xizmati
