O‘zbekiston Respublikasi Prezidentining 2020-yil 7-maydagi “Matematika sohasidagi ta’lim sifatini oshirish va ilmiy-tadqiqotlarni rivojlantirish chora-tadbirlari to‘g‘risida”gi PQ-4708-sonli Qarorida iqtidorli yoshlarni aniqlash hamda ularning matematika fani bo‘yicha mahalliy va xalqaro fan olimpiadalarida muvaffaqiyatli ishtirok etishini hamda sovrinli o‘rinlarni egallashini ta’minlash asosiy maqsadlardan biri sifatida belgilangan. Mazkur Qarorda belgilangan vazifalarning ijrosini ta’minlash yuzasidan Buxoro davlat universitetida ham bir qator tizimli ishlar amalga oshirilmoqda. Hozirgi kunda pandemiya tufayli ta‘tilga chiqarilgan talabalar, bo‘sh vaqtdan unumli foydalangan holda chuqur bilim olish, o‘z ustida mustaqil ishlash, chet tilini mukammal o‘rganish, ilmiy maqolalar yozish kabi ishlar bilan mashg‘ul bo‘moqdalar. O‘z navbatida ularning iqtidorlarini namoyon etishlariga imkoniyatlar yaratish, intelektual salohiyatini qo‘llab-quvvatlash va rag‘batlantirish maqsadida Respublika va xalqaro miqyosida onlayn olimpiadalar va turli tanlovlar tashkil qilinmoqda.2020-yilning 25-30 iyul kunlari Universitet talabalari eng nufuzli hisoblangan IMC (International Mathematical Competition for university students) xalqaro matematika olimpiadasi bu yil pandemiya tufayli onlayn tarzda o‘tkazildi. Ushbu olimpiadada dunyoning 46 ta davlatidan jami 546 nafar talabalar ishtirok etdi. Jumladan, Massachusetts Institute of Technology, Stanford University, New York University, University of Maryland, Carnegie Mellon University (AQSH), Saint-Petersburg State University, Moscow Institute of Physics and Technology, Higher School of Economics (Rossiya), Tel Aviv University, Bar Ilan University (Isroil), Rheinische Friedrich-Wilhelms-Universität Bonn, Universität Leipzig, Georg-August-Universität Göttingen (Germaniya), University of Cambridge, University College London, Imperial College London, University of Manchester, University of Warwick, University of Leeds (Buyuk Britaniya) va boshqa nufuzli universitetlardan talabalar ishtirok etishdi. Sanab o‘tilgan juda yuqori reytingga ega universitetlar talabalari bilan bir qatorda Buxoro davlat universiteti Matematika ta‘lim yo‘nalishi talabasi Sobir Boymurodov ham mazkur xalqaro olimpiadada munosib ishtirok etdi hamda kumush medal sohibi bo‘lib, butun jahon yoshlari bilan bellasha olish qobiliyatiga ega ekanligini namoyon etdi. Xalqaro olimpiadaning yopilish marosimi va g‘oliblarni e’lon qilish jarayoni bilan Youtubedagi ushbu havol orqali tanishish mumkin: https://www.youtube.com/watch?v=cEssB2VmtQ0Sobir Boymurodov talabalik davridan boshlab Respublika va xalqaro matematika olimpiadalarida faol ishtirok etib kelmoqda. Xususan, 2018-yil “Oliy ta‘lim muassasalari talabalari o‘rtasida Al-Xorazmiy nomli yosh matematiklarning 1-Xalqaro olimpiadasi”da ishtirok etib, olimpiadaning maxsus “faxriy yorlig‘i”ni qo‘lga kiritgan edi. S.Boymurodov hozirgi paytda f.-m.f.n., dots. T.H.Rasulov ilmiy rahbarligida “Yarim chegaralangan 4-tartibli blok operatorli matrisalar uchun optimal quyi baholar” mavzusida ilmiy-taqdiqot ishlari olib bormoqda hamda olimpiada masalalarini yechish bo‘yicha bilim va ko‘nikmalarini Yakobi matrisalari uchun Gershgorin chegaralarini topishga tadbiq qilib kelmoqda.Ayni damda BuxDU yosh matematik-olimpiadachilar jamoasi “Oliy ta‘lim muassasalari talabalari o‘rtasida Al-Xorazmiy nomli yosh matematiklarning 2-Xalqaro olimpiadasi”da ishtirok etish uchun tayyorgarlik ko‘rmoqdalar. Jamoa rahbari, Matematika kafedrasi dotsenti, fizika-matematika fanlari nomzodi Rasulov To‘lqin Husenovich va jamoa ilmiy maslahatchisi, tayanch doktorant Dilmurodov Elyor Baxtiyorovichlar talabalarning mazkur olimpiadada ham munosib ishtirokini ta‘minlash maqsadida muntazam ravishda onlayn mashg‘ulotlarni olib bormoqdalar hamda uzluksiz ravishda onlayn olimpiadalar o‘tkazib kelmoqdalar. Bunda talabalarning matematik savodxonligini oshirish, jahon ta’lim sohasida yanada integratsiyalashuvi uchun qo‘shimcha shart-sharoitlar yaratish hamda matematika fanidan o‘tkaziladigan xalqaro va Respublika olimpiada masalalarini yechish ko‘nikmalarini shakllantirishga alohida e‘tibor qaratilmoqda.
