Buxoro davlat universiteti “Kimyo” kafedrasi oʼqituvchilari B.B. Olimov va M.M. Amonovalar OTM hamda maktablar o`rtasidagi hamkorlik doirasida Shofirkon tumani 50 - umumtaʼlim maktabida boʼlishdi.Oʼzbekiston Respublikasi Prezidenti Sh.M. Mirziyoyev tomonidan ilgari surilgan “Yoshlar maʼnaviyatini yuksaltirish, ularning boʼsh vaqtlarini mazmunli tashkil etish” boʼyicha 5 ta muhim tashabbusning yoshlar hayotida muhim ahamiyatga ega ekanligini maktab direktori G`. Rustamov taʼkidladi. Uning ijrosini taʼminlash uchun 50-maktabda darslardan keyin 20 ta fan va sport toʼgaraklari tashkil qilingan. Maktabda “5 ta muhim tashabbus burchagi” tashkil qilingan boʼlib, unda oʼquvchilarning qoʼl mehnati bilan yasalgan koʼplab kashtachilik, tikuvchilik, to`quvchilik va tasviriy sanʼat asarlari kishi ko`zini quvnatadi. Maktab tuman markazidan ancha uzoqda joylashgan. Maktabda jami 318 nafar o`quvchi bilim oladi. U yerda 1 ta kimyo xonasi mavjud ekan. Kichik maktab bo`lsa ham barcha qulayliklar yaratilgan. Kutubxona homiylar tomonidan badiiy adabiyotlar bilan doimiy ravishda ta`minlanib borilar ekan. Kompyuter xonasida jami 15 ta kompyuter bo`lib, 8 tasi internet tarmog`iga ulangan. Kimyo fani o`qituvchisi Sh. Jumayeva bilan suhbatlashganimizda o`quvchilarning kimyo faniga bo`lgan qiziqishi yuqoriligini ammo tajribalarni bajarish uchun kimyoviy reaktivlar ozligini ta`kidladilar. Shu sababdan biz kimyo fani o`qituvchisiga laboratoriya ishlari bajarib ko`rsatilgan virtual laboratoriya videotasvirlarini yuklab berdik. Kimyo laboratoriyasida reaktiv va jihozlar yetarli darajada bo`lmasa ham bolalarning kimyo fanini oʼrganishga boʼlgan ishtiyoqi yuqoriligi bu maktabda darslarning oʼz vaqtida boʼlayotganligi, oʼquvchilarning barchasi darsliklar bilan toʼliq taʼminlanganligidan dalolat beradi.
