2019 yilning 10-17 noyabr kunlari Mog`uliston poytaxti Ulan-Batarda boks bo`yicha yoshlar o`rtasida Osiyo chempionati bo`lib o`tdi. Chempionatda O`zbekiston boks federatsiyasi nomidan 113 nafar o`g`il bola va 67 nafar qiz bola bokschilar g`oliblik uchun kurashdilar. Ulan-Batarda bokschilarimiz do`stona kutib olingandan so`ng, kunning ikkinchi yarmida poytaxtdagi "Bayangal" mehmonxonasida qur`a tashlash marosimi bo`lib o`tdi. Ta`kidlash o`rinliki, ushbu chempionatda qit`amizning 16 mamlakatidan 180 nafar bokschilar ishtirok etdilar. Shuningdek chempionat sharafiga bag`ishlangan mitingda terma jamoamizning katta murabbiyi Hamid Tangriberdiyev chempionat haqida va jamoaning tayyorgarligi to`g`risida o`z fikrlarini bildirib o`tdi hamda chempionatga start berildi. 10-17 noyabr kunlari asosiy musobaqalar yakuniga ko`ra, terma jamoamizning 18 bokschisi musobaqa finaligacha yetib keldi. Finalda esa O`zbekiston 14 ta medalga ega bo`ldi. 2 ta oltin, 5 ta kumush va 7 ta bronza medallar bokschilarimiz tomonidan qo`lga kiritildi. Shuni alohida ta`kidlash joizki, chempionatdagi oltin medallardan birini 75 kg vazn toifasida Buxoro davlat universiteti "Jismoniy madaniyat" fakulteti 1-bosqich talabasi Suxrob Qayimov qo`lga kiritdi. Suxrob Qayimov chempionatda 4 nafar Osiyoning eng kuchli charmqo`lqop ustalarini yengib g`oliblik shohsupasiga ko`tarildi. U dastlab ringga ko`tarilganda mezbon mamlakat vakili Gantulga Batbayarni 3:2 hisobda mag`lub etib, chorak finalda xitoylik tengdoshi Ayiduosi Entemakaga hech qanday imkoniyat qoldirmasdan 5:0 hisobda mag`lubiyatga uchratdi. Yarim finalda esa qirg`izistonlik Islombek Turg`unovni 5:0 hisobda, musoboqa finalida qozog`istonlik bokschi Bektashni 4:1 hisobida mag`lub etib, 75 kg vazn toifasida yoshlar o`rtasida o`tkazilgan Osiyo chempionati chempioniga aylandi. Abatta, bu yutuqlar zamirida katta mehnat, sabr-toqat va murabbiylarning o`gitlari yotadi. Shu bilan birga yurtboshimizning yoshlar sportiga ayniqsa sportning boks turiga qaratilayotgan e`tibori bu g`alabalar sababchisi hisoblanadi. Mana necha yildirki, o`zbek boksini nafaqat Osiyo balki, dunyo mamlakatlari tan olib kelmoqda. Sportchilarimizning boksdagi g`alabalari mamlakatimizni dunyo hamjamiyatida tan olinishiga va o`z o`rniga, o`z nomiga ega bo`lishiga xizmat qilmoqda. Muxtasar qilib aytganda, yurtimizni hech qaysi soha sportchalik, yoyinki bokschalik dunyoda tanita olmaydi. BuxDU talabasi Suxrob Qayimovni butun universitet jamoasi erishilgan g`alaba bilan tabriklaydi va kelgusida olimpiada oltin medalini qo`lga kiritishini tilab qoladi. BuxDU matbuot xizmati xodimi: Javohir Saidov