Xuddi shu mavzuda Buxoro davlat universitetida katta tadbir bo‘lib o‘tdi. Universitetning barcha fakultet dekan o‘rinbosarlari, 25 nafar professor o‘qituvchilar hamda 400 nafar talabalar ishtirok etgan ushbu tadbirda BuxDU prorektori A.Kadirov, universitetning “Milliy g‘oya, ma’naviyat asoslari va huquq ta’limi” kafedrasi mudiri S.Raupov, Xalq deputatlari Buxoro viloyat Kengashi deputati Sh.Ismatov, viloyat prokraturasi xodimi K.Qilichev, Buxoro shahar “Sayfiddin Boxarziy” masjid imom xatibi R.Kamolov va Davlat xavfsizlik boshqarmasi xodimlari o‘z chiqishlarida tinchlik – dunyodagi eng oliy ne’mat ekanligini alohida ta’kidlab o‘tdilar.Inson o‘z maqsadi yo‘lida doimo izlanadi. Ularning ro‘yobga chiqishi uchun esa eng zaruri tinchlik va osoyishtalik kerak. Oiladagi xotirjamlik insonning ish samaradorligini oshirishga, oila mustahkamligiga asos bo‘lsa, yurtdagi tinchlik mamlakat taraqqiyotiga, farovonligiga zamin yaratadi.Prezidentimiz Shavkat Mirziyoyev o‘zlarining saylovoldi dasturlarida tinchlik-osoyishtalik va barqarorlikni ta’minlash, mamlakatimiz iqtisodiy qudratini mustahkamlash, xalqimiz uchun munosib turmush sharoitini yaratishni bosh maqsad qilib belgilagan edilar va bu munosib tarzda amalga oshirilmoqda. Haqiqatan ham inson uchun tinchlik-osoyishtalikdan yaxshiroq ne’mat yo‘q. Oila, yurt notinch bo‘lsa, to‘y-tomosha, shodlik-xurramlik, xullas, hayotning hech bir ne’mati tatimaydi. Urush-janjal sabab mehr-oqibat, insoniylik unutiladi, ezgu maqsadlar amalga oshmay qoladi. Bundan Alloh asrasin.Tinchlik-osoyishtalikni mustahkamlash, ikki tomonlama hamkorlik, do‘stlikni yanada kuchaytirish borasida Prezidentimiz o‘zlarining saylovoldi dasturlarida “Tashqi siyosatni amalga oshirishda barcha davlatlar, birinchi navbatda qo‘shni mamlakatlar bilan do‘stona munosabatlar va o‘zaro manfaatli hamkorlikni yanada mustahkamlashni o‘zimizning birinchi galdagi vazifamiz deb bilamiz” deya bejizga e’tibor qaratmaganlar. Biz ayni kunda ularning aniq ijrosini ham ko‘rib turibmizki, buni hech kim inkor etolmaydi.Tinchligimizga ko‘z tegmasin,-deyishdi tadbir ishtirokchilari.Mannon OtaboyBuxDU: matbuot kotibi
