Buxoro davlat universiteti va Yaponiyaning Vakayama universiteti o‘rtasida aprel oyida kelishilgan hamkorlik, bugun yanada yuqori pog‘onalarga ko‘tarildi.21-noyabr BuxDU tarixida o‘chmas sana bo‘lib qolishi shubhasiz. Zero, O‘zbekiston va Kun chiqar mamlakatlari milliy qadriyat va an’analari anchayin yaqin mamlakatlar desak mubolag‘a bo‘lmaydi.Ana shu ikki xalqning vakillari sifatida Buxoro davlat universiteti va Vakayama universiteti tashabbuslari bilan BuxDUda “BuxDU-Vakayama turizm ta’limi va tadqiqotlari markazi” tashkil etildi. Kelishuvlar muhrlar bilan mustahkamlandi.Nega Vakayama tanlandi? Chunki ushbu oliygoh 1949-yilda tashkil topgan bo‘lib, bu yerdagi turizm fakulteti dunyo miqyosida o‘z mavqeiga ega. Qolaversa, Butunjahon turizm tashkilotining UNWTOning TedQual sertifikatini ham qo‘lga kiritgan Yaponiyadagi yagona oliygohdir. Ularning ana shu tajribasi dunyo sayyohlik markazlaridan biriga aylanib borayotgan Buxoro uchun kadrlar tayyorlashda muhim omil bo‘ladi. Tadbirning ochilishida so‘zga chiqqanlar o‘zaro hamkorlikning ushbu jihatiga katta e’tibor qaratdilar. Yig‘ilishda Buxoro viloyat hokimi tabrigini o‘qib eshittirgan Azimjon Po‘latov, buxoroliklar ikki oliygoh o‘rtasidagi hamkorlik turizmni rivojlantirishiga, Yaponiyalik sayyohlarning Buxoroga tashrifini yanada oshirishga, sohaga oid kadrlar tayyorlashda katta turtki berishiga ishonch bildirib, mehmonlarni ezgulikka xizmat qiluvchi anjuman bilan tabrikladi.Buxoro davlat universiteti rektori o‘z ma’ruzasida bugun ikki oliygoh o‘rtasida imzolanayotgan hamkorlik shartnomalari Prezidentimizning mamlakatimizda turizmni rivojlantirish borasidagi qaror va farmonlarining amaliy natijasi ekanligini alohida ta’kidladi. – Hamkorlik ta’lim jarayoni sifatini, ta’lim loyihalarini yangi pog‘onaga olib chiqadi. Bugungi imzolanadigan shartnoma yaqin kelajakda amalga oshiriladigan ulkan ishlarimizning debochasidir.O‘qituvchi va talabalarimizning turizmni rivojlantirishda malaka oshirishlarining yana bir qulay yo‘li Vakayama universitetida professor-o‘qituvchilar kelib BuxDUda dars o‘tishlaridir. Qolaversa, ikki oliygoh hamkorligi va tashabbusi bilan biz turizmni yangi bosqichga olib chiqishga xizmat qiladigan konferensiyalar, forumlar va seminarlar tashkil yetishga ham tayyormiz. Bunday intilish va izlanishlar yangi imkoniyatlar eshigini ochadi, deb o‘ylayman.Vakayama universiteti vakili Takuya Fuji bunday ajoyib tadbirda ishtirok etayotganidan, tadqiqotlar markazi faoliyati uchun yaratilgan shart-sharoitlardan mamnunligini izhor etdi. Shuningdek, Vakayama universiteti rektorining tabrik xatini o‘qib eshittirdi. Bundan tashqari aprel oyida imzolangan memorandumdan so‘ng, juda qisqa fursat ichida “BuxDU-Vakayama turizm ta’limi va tadqiqotlari markazini” tashkil etishda bosh-qosh bo‘lgan BuxDU rektori A.To‘laganovga va turizm fakulteti dekani A.Jo‘raevga hamda barcha hamkorlarga minnatdorchilik bildirdi.Mart oylarida Vakayama universiteti talaba va o‘qituvchilar guruhi BuxDUga tashrif buyurishini hamda BuxDU rektorini Vakayama universitetida kutib qolishlarini ma’lum qildi. Mannon OtaboyBuxDU matbuot kotibi
