12.06.2026

Buxoro davlat universiteti mezbonligida viloyatimizdagi barcha oliy ta’lim muassasalari talaba-yoshlarini o‘zida birlashtirgan, chinakam yoshlik, shijoat va iqtidor bayrami — “Talaba Fest” festivali ko'tarinki ruhda va yuqori saviyada bo‘lib o‘tdi. Tantanali ochilish marosimi bilan boshlangan mazkur yirik festival universitet hududini tom ma'noda ulkan madaniyat, ilm-fan, sport va san'at maydoniga aylantirdi.

Yoshlarning kreativligini namoyish etuvchi “Eng yaxshi fotosuratlar” va “Milliy hamda zamonaviy liboslar” ko'rgazmalari barchaning e'tiborini tortdi. Bo'lajak muhandislar tomonidan taqdim etilgan "Robototexnika va innovatsiyalar ko‘rgazmasi" esa yoshlarimizning IT va texnika sohasidagi ulkan salohiyatini ko'rsatib berdi. Pazanda talabalar o'rtasida o'tkazilgan “Shashlik day” va milliy taomlar musobaqasi bayramga o'zgacha fayz ulashdi.

Viloyatning eng zukko yoshlari “Zakovat” intellektual o‘yini arenasi hamda “IBRAT” debatlari va “Munozara” turnirlarida o'zaro bellashib, o'tkir mantiq va notiqlik mahoratlarini sinovdan o'tkazdilar.

Sog'lom turmush tarzini targ'ib qiluvchi “Talaba sport o‘yinlari” qizg'in bahslarga boy bo'ldi. Universitetda iqtidorli ijodkorlar ishtirokida “She’riyat kechasi”, ochiq maydonlarda esa ibratli Teatr studiyalari chiqishlari hamda QVZ jamoalarining kulgiga boy shoulari tashkil etildi. Yoshlar "Karaoke" maydonchasida jonli qo'shiqlar kuylab, dildan hordiq chiqarishdi.

Buxoro davlat universiteti mazkur festivalda faol ishtirok etgan barcha hamkor oliygohlar jamoalariga, tashkilotchilarga va shijoatli yoshlarga o'z minnatdorchiligini bildiradi. Yoshlarimizning birligi va birdamligi bardavom bo'lsin!

BuxDU Axborot xizmati