21.05.2026

Buxoro shahridagi Kasbiy ko‘nikmalar markazida O‘zbekiston kasaba uyushmalari Federatsiyasi viloyat kengashi tashabbusi bilan “Ekologik faol kasaba uyushmasi jamoasi” ko‘rik-tanlovining viloyat bosqichi o‘tkazildi.

Tanlovda viloyatdagi turli korxona, tashkilot va muassasalar qatorida Buxoro davlat universiteti kasaba uyushmasi jamoasi ham o‘zining innovatsion ishlanmalari va eko-loyihalari bilan faol ishtirok etdi. Ishtirokchi jamoalar hududlarni obodonlashtirish, chiqindilarni saralash, suv va energiya resurslarini tejash hamda ekologik targ‘ibot masalalari bo‘yicha o‘z tajribalarini namoyish etdilar. Tadbir nafaqat sog‘lom raqobat muhitini shakllantirish, balki aholining tabiatga nisbatan mas’uliyatini kuchaytirishga ham xizmat qildi.
 

Buxoro davlat universiteti jamoasi tomonidan taqdim etilgan ilmiy asoslangan eko-tashabbuslar hakamlar hay’ati tomonidan munosib e’tirof etilib, jamoa faxrli III darajali diplom bilan taqdirlandi. Ushbu natija universitetda ekologik madaniyatni yuksaltirish hamda atrof-muhitni muhofaza qilish borasida amalga oshirilayotgan tizimli ishlarning amaliy ifodasidir. Tadbir yakunida faol jamoalarning ilg‘or tajribalarini ommalashtirish bo‘yicha takliflar ilgari surildi.