Mamlakatimiz mustaqillikka erishgandan so’ng har bir sohaga alohida e’tibor qaratila boshlandi. Bu yo’lda eng avvalo tariximizni, madaniyatimizni tiklash, o’zligimizni anglash asosiy maqsadlardan biri etib belgilandi. SHuningdek, yoshlarimizga keng imkoniyatlar eshigi ochilib, ta’lim-tarbiya sohasini rivojlantirish borasida belgilangan ulug’vor maqsadlarni ro’yobga chiqarish, uzluksiz ta’lim tizimining uzviy davomi sifatida oliy ta’limga yondashuv tubdan o’zgardi.Bugungi kunda yurtimizda, xususan Buxoro davlat universitetida talaba-yoshlarning puxta ilm olishi, o’z iste’dodi va bilimlarini ro’yobga chiqarishi uchun barcha shart-sharoitlar yaratilgan. Bizning asosiy maqsadimiz o’z sohasining malakali kadrlarini tayyorlash, yoshlarga keng imkoniyatlar yaratib berish va ularning iste’dodlarni qo’llab-quvvatlashdan iboratdir. SHu maqsadda joriy yilning 11 iyulь kuni Buxoro davlat universitetining katta yig’inlari zalida 13 ta mutaxassislik bo’yicha 29 nafar magistrlarimizga diplom berish marosi bo’lib o’tdi. Tadbirda universitet rektori t.f.d., prof. A.A. Tulaganov, universitet xodimlar kasaba uyumasi raisi p.f.d., prof. S.Q. Qahhorov, o’quv ishlari bo’yicha prorektor, f-m.f.d., prof. D.Q. Durdiyev, ma’naviy-ma’rifiy ishlari bo’yicha prorektor, prof. O.M. Qodirov, magistratura bo’limi boshlig’i iqtisodiyot fanlari bo’yicha falsafa doktori (PhD)., dotsent O.S. Qahhorov, shuningdek fakultet dekanlari, kafedra mudirlari, professor-o’qituvchilar va mehmonlar ishtirok etishdi. Keng jamoatchilik vakillari, ota-onalar va talabalar ishtirokida tashkil etgan tadbirda universitetimiz rektori prof. A.A. Tulaganov so’zga chiqib, bugungi kunda mamlakatimizda ta’lim tizimida amalga oshirilayotgan tub islohotlar har jihatdan etuk mutaxassislar tayyorlashda muhim ahamiyat kasb etayotganini alohida ta’kidlab, bitiruvchi magistrlarimizga, katta hayot ostonasida turgan yoshlarimizga oq yo’l tiladi. Bugun katta hayotga yo’l olayotgan talaba-yoshlarimiz yurtimiz ravnaqi, universitetmiz kelajagi va uning baxtu-saodati yo’lidagi ezgu ishlarida o’zlarining munosib hissalarini qo’shadilar. Chunki ular bu dargohda ko’plab mehrli ustozlardan ilm yo’lidagi mashaqqatli mehnat sirlaridan bahramand bo’lganlar. Ustozlarimizning o’gitlari, ularning bergan ta’lim-tarbiyalari magistrlarimizning hayot yo’lidagi yo’llarini yoritib turishiga ishonamiz. Magistratura bo’limi boshlig’i: O.S.Qahhorov
