Buxoro davlat universitetida xorijiy universitetlardan talabalarimizga ta`lim berish uchun tashrif burgan professor-o'qituvchilar hamda BuxDU rektori Obidjon Xamidov o'rtasida uchrashuv bo'lib o'tdi.
Uchrashuvda xorijlik mutaxassislar — AQShlik ingliz tili oʻqituvchisi Ketlin Patton, Buyuk britaniyalik xalqaro tarjimon Kerol Ermakova, Tehron universiteti professor-o`qituvchilari tuproqshunoslik fanlari nomzodi Asadi Husayn Nur Muhammad hamda fizik Vaezallaei Seyedmehdi Seyedalilar, koreyalik mutaxassis Kim Okchun, Qohira universiteti professori Ayman Usmon Abdelalim Mohamed, pokistonlik o`qituvchi Fouzia Amir, Qarag‘anda davlat texnika universiteti professor-o'qituvchilari Valeriy Biryukov, Aygul Daribekova, Nazgul Daribekova, Guldaray Ruandina, Omsk davlat pedagogika universiteti dotsenti Pyotr Bolshanik, Qozon Federal universiteti professori Olga Demyanova, dotsenti Mariya Pugachova, Bratislava universiteti professori Frantisek Olsavskiy, italiyalik xalqaro hamkorlik bo‘limi bosh mutaxassisi Charruas Matyeular ishtirok etishdi.
Ochiq muloqot tarzidagi uchrashuvni Xalqaro hamkorlik bo'yicha prorektor Abror Jo'rayev ochib berish asnosida chet el ta’lim muassasalari va ilmiy markazlari bilan hamkorlikni rivojlantirish va mustahkamlash, xorijiy ta’lim muassasalaridagi fan va texnika sohasidagi ijobiy yutuqlarni o’rganishda ko’maklashish, BuxDU talabalari, tadqiqotchilar va professor-o’qituvchilarining xalqaro ilmiy faoliyatda qatnashishlarini qo’llab-quvvatlash, xalqaro loyihalarda universitet vakillarining ishtirokini ta’minlash hamda o'quv jarayoniga xorijlik yetakchi mutaxassislar va ekspertlarni jalb qilish borasida tizimli ishlar olib borilayotgani xususida so`zladi. Ushbu uchrashuv ham ana shunday islohotlarning natijasi ekanligini ta'kidladi.
Uchrashuvda BuxDU rektori, iqtisodiyot fanlari doktori, professor Obidjon Xamidov xalqaro loyihalar, muassasaning jahon reytingidagi o'rni, bugungi kunda izchil olib borilayotgan islohotlar, pedagog xodimlar uchun yaratilgan shart-sharoit xususida mehmon mutaxassislarga so'zladi. Xorijlik mutaxassislarning BuxDUda faoliyat yuritayotganidan mamnuniyatini izhor etdi.
Ilmiy ishlar va innovatsiyalar bo'yicha prorektor To`lqin Rasulov so'zga chiqib, BuxDUdagi ilmiy salohiyat, innovatsion g`oyalar, intiluvchan talaba-yoshlarning ilmiy izlanishlari xususida axborot berdi.
Buxoro davlat universiteti muhiti va talabalari menda yaxshi taassurot qoldirdi, — dedi Bratislava universiteti professori Frantisek Olsavskiy,– Ayniqsa, talabalarning fikrlari, maqsadlari meni lol qoldirdi. O`qituvchi va talaba munosabatida hurmat yaxshi yo`lga qo`yilgan, ustozning mehnatini qadrlashar ekan. Buxoro davlat universiteti dunyo tan olishiga loyiq. Biz ham ushbu universitet bilan hamkorlik qilishdan manfaatdormiz.
Shuningdek, ochiq muloqot tarzida o'tgan uchrashuvda BuxDU professor-o'qituvchilari ham so`zga chiqib, fikr-mulohazalarini o`rtoqlashishdi. Uchrashuv mobaynida har bir xorijlik mutaxassisning fikri, taassurotlari tinglanib, kelgusidagi rejalar muhokama qilindi.
