Mustaqil akkreditatsiya va reyting agentligi (IAAR) taklifiga asosan ta’lim sifatini ta’minlash bo‘yicha bo‘lib o‘tadigan VII Markaziy Osiyo xalqaro forumida ishtirok etish hamda Qozog’iston Respublikasining bir qator oliy ta’lim muassasalari bilan hamkorlikni yo’lga qo’yish va tajriba almashish maqsadida Buxoro davlat universiteti delegatsiyasi 2023-yil 3-8-oktabr kunlari Ostona shahrida xizmat safarida bo’lib turibdi.
Delegatsiya tarkibi Buxoro davlat universiteti Ilmiy ishlar va innovatsiyalar bo‘yicha prorektor To’lqin Rasulov, ta’lim sifatini nazorat qilish departamenti boshlig’i Ziyodulla Nurov, “Yashil” iqtisodiyot va agrobiznes kafedrasi mudiri vaszifasini vaqtincha bajaruvchi Suxrob Davlatov, Raqamli ta’lim texnologiyalari departamenti boshlig’i Murodjon Xusenovlardan iborat.
Mazkur tashrif doirasida Ostona shahrida joylashgan QS va THE xalqaro reytinglarda TOP-1000 ta universitetlari ro’yxatidan joy olgan bir qator yetakchi oliy ta’lim muassasalar tajribasini o’rganish rejalashtirilgan.
BuxDU vakillari tashrifning birinchi kunida Qozog’iston milliy reytinglarida yetakchi o’ntalik universitetlari qatoridan, QS xalqaro universitetlar reytingida esa 355-o’rinda bo’lgan L.N.Gumilyov nomidagi Yevroosiyo milliy universitetiga tashrif buyurishdi. Delegatsiyasi vakillari bilan L.N.Gumilyov nomidagi Yevroosiyo milliy universiteti O‘quv ishlari bo‘yicha prorektori Makish Serik boshchiligidagi rahbariat vakillari o’rtasida davra suhbati tashkil etildi. Qoʻshma ilmiy tadqiqotlar, taʼlim dasturlari, akademik mobillik, taʼlim dasturlarini ekspertizadan oʻtkazish, magistratura talabalariga ilmiy rahbarlik qilish, matematika, fizika, muhandislik sohalaridagi raqamli transformatsiyalar, shuningdek “Yashil” iqtisodiyot bilan bogʻliq oʻzaro hamkorlik imkoniyatlari, ta’lim va ilm-fan sohasida aniq loyihalarni amalga oshirish masalalari muhokama qilindi.
Shuningdek, marketing, xalqaro savdo yo‘nalishlarida kadrlar tayyorlaydigan iqtisodiy yoʻnalishlarda qoʻshma taʼlim dasturlarini amalga oshirishda hamkorlik qilish toʻgʻrisida kelishib olindi. Kelajakda marketing, xalqaro savdo va “Yashil” iqtisodiyot yo’nalishlarida L.N.Gumilyov nomidagi Yevroosiyo milliy universiteti o‘rtasida hamkorlik istiqbollarini muhokama qilish uchun uchrashuv o‘tkazilishi rejalashtirilgan.
Delegatsiya vakillari universitet faoliyati bilan yaqindan tanishish va kerakli tajribalarni o’rganish maqsadida universitetning bir qator bo’linmalariga tashrif buyurdi. Jumladan, O‘quv ishlari bo‘limi, Raqamli rivojlanish va masofaviy ta’lim bo‘limi, Ta’minlash bo'limi, Xalqaro hamkorlik boshqarmasi, Kasbga yo'naltirish bo'limiga tashrif buyurib, professor-o’qituvchilarning o’quv yuklamasini shakllantirish, ta’limda zamonaviy raqamli texnologiyalarni joriy qilish asosida masofaviy ta’lim resurslarini yaratish bo’yicha ilg’or tajribalar o’rganildi. Shuningdek, talabalarni kasbga yo’naltirish va bitiruvchilar klubiga tashrif doirasida Qozog’iston Respublikasida taniqli kishilardan iborat bo’lgan universitetning sobiq bitiruvchilarini universitet strategiyasini samalga oshirishda jalb qilish bo’yicha tajribalar ham o’rganildi.
