Qadrli jurnalistlar, OAV xodimlari! Siz azizlarni kasb bayramingiz – Matbuot va ommaviy axborot vositalari xodimlari kuni bilan chin qalbimdan muborakbod etaman.
Hayotimizdagi bugungi ulkan o‘zgarishlar, islohotlar barchamizdan yangicha ishlashni, yangi g‘oya va tashabbuslar bilan maydonga chiqishni talab etmoqda. Bu borada sizning davlat va jamiyat boshqaruvida ochiqlik va oshkoralik tamoyillarini mustahkamlash, jamoatchilik nazoratini kuchaytirishga qaratilgan demokratik islohotlarni amalga oshirishda faollik ko‘rsatib kelayotganingiz, global axborot maydonida milliy manfaatlarimizni himoya qilish, yurtimizdagi yaratuvchilik va yangilanish jarayonlari, erishilayotgan yutuqlarni keng targ‘ib etishdagi xizmatlaringiz, soha uchun malakali professional kadrlarni tayyorlash, yosh avlodni vatanga muhabbat va sadoqat, milliy va umuminsoniy qadriyatlar ruhida tarbiyalash borasidagi samarali faoliyatingiz tahsinga sazovor.
Bugungi kun nuqtayi-nazaridan eng og`ir va mas’uliyatli kasb egasi, shubhasiz, sizlarsiz! So`nggi yillarda so`z aytish va fikriy erkinlik borasida qilinayotgan ishlar kishini quvontiradi. Bu borada matbuot ahli, jurnalistlarning o`z fikrini, tahlillarini erkin bayon etishi, o`zi qiziqqan sohada jurnalistik surishtiruvlar olib borishi, islohotlarga odob-axloq doirasida munosabatini bildirishi, muxtasar qilib aytganda, O`zbekiston jurnalistikasining jahon axborot maydonida munosib o‘rin egallashi uchun mustahkam poydevor yaratildi.
Shu ma’noda bugungi kunda erishilayotgan har bir yutuqda ommaviy axborot vositalarining hissasi bor va bundan so`ng ham ularning jamiyat rivojidagi o`rni suv va havodek zarur, desak also mubolag`a bo`lmaydi.
Yangi O`zbekistonning yangicha fikrli, kreativ va tezkor, adolatni mezon qilgan jurnalistlari, matbuot xodimlari! Bosma nashr yoxud muxbirmisiz, telejurnalist yoki radioboshlovchimisiz, operator yoki matbuot xizmati xodimi bo`lasizmi, xullas, har biringiz millat buguni va ertasi uchun ahamiyatlisiz! Har bir rahbar faoliyatini, xususan, Oliy ta’lim muassasasi hamda ta’lim tizimi sohasidagi yangiliklarni yoritishda OTM matbuot kotiblarining xizmati benihoya katta. Qilinayotga ishlar tezkorlik va xolislik asosida yoritilar ekan, ijodkor va ixtirochi talabalar, qobiliyatli yoshlar respublika miqyosida tanitilib borilar ekan, ish sifati oshadi.
Bugungi sana bilan Yangi O`zbekistonning barcha jurnalistlari, blogerlari, shuningdek, Buxoro davlat universitetining Matbuot xizmati xodimlarini, Jurnalistika yo`nalishi ustozlari hamda talabalarini chin qalbimdan tabriklayman. Mashaqqatli va oliyjanob faoliyatingizda ulkan muvaffaqiyatlar tilayman. Sihat-salomatlik, baxt-u saodat, ijodiy barkamollik hamisha yor bo`lsin.
Bayramingiz muborak bo‘lsin!
Xamidov Obidjon Xafizovich
Buxoro davlat universiteti rektori,
Iqtisodiyot fanlari doktori, professor
