Bugun Buxoro davlat universiteti faollar zalida Jondor tuman hokimi Hikmatov San’atillo Nusratovich va viloyatimizdagi OTMlar bakalavr ta’lim yoʻnalishlari va magistratura mutaxassisliklari bitiruvchilari ishtirokida “Tuman hokimi va yoshlar uchrashuvi” boʻlib oʻtdi. Tadbirda jami 140 nafar bitiruvchi ishtirok etdi. Jumladan,
“Agronomiya va biotexnologiya” fakultetidan – 2 nafar;
“Jismoniy madaniyat” fakultetidan – 33 nafar;
“Tarix va yuridik” fakultetidan – 5 nafar;
“Xorijiy tillar” fakultetidan – 8 nafar;
“Axborot texnologiyalari” fakultetidan – 39 nafar;
“Filologiya” fakultetidan – 2 nafar;
“Tabiiy fanlar” fakultetidan – 8 nafar;
“Fizika-matematika” fakultetidan – 29 nafar;
Buxoro Muhandislik texnologiyalari institutidan – 14 nafar bitiruvchi ishtirok etdi.
Tadbir qizgʻin savol-javob tarzida tashkil etildi va universitet rektori, tuman hokimi hamda mutasaddi tashkilot vakillariga yoshlar tomonidan murojaatlar bildirildi.
Qashqadaryolik “Milliy gʻoya, ma’naviyat asoslari va huquq ta’limi” yoʻnalishi talabasi tomonidan shu kabi tadbirlarning faqat Buxoro viloyati tumanlari doirasida emas, boshqa viloyatlardan kelib oʻqiyotgan talabalar uchun respublika miqyosida tashkil etilishi taklifini bildirdi.
4-bosqich “Xorijiy tillar” fakulteti talabasi darslaridan boʻsh vaqtida ingliz tilidan repetitorlik faoliyatini amalga oshirayotganini, 9-maktab binosida joylashganligini va oʻquvchilar sonini oshirish maqsadida boshqa kattaroq joy ajratib berishlarini soʻradi. Unga javoban tuman Aholi bandligiga koʻmaklashish markazi boshligʻi M.Kenjayev til kurslari oʻtayotgan repetitorlar uchun davlat tomonidan uchtagacha kam ta’minlangan oila farzandini oʻqitish sharti bilan subsidiya asosida joy va zaruriy jihozlar olish uchun 50 mln soʻmgacha pul mablagʻlari ajratilishini bildirib, markazga murojaat qilishini aytdi.
4-bosqich “Ona tili va adabiyoti: oʻzbek tili” yoʻnalishi bitiruvchisi yosh oila boʻlganligi, yaqinda Kogon tumanidan Jondor tumaniga kelin boʻlib tushganligi sababli tuman hokimidan subsidiya asosida koʻp qavatli uylardan xona ajratish boʻyicha amaliy yordam soʻradi. Tuman hokimi tomonidan mazkur masala darhol hal qilinishi bildirildi.
4-bosqich “Jismoniy madaniyat: xotin-qizlar sporti” yoʻnalishi bitiruvchisi oʻqishni tamomlagandan soʻng ichki ishlar organlariga ishga joylashmoqchi ekanligini aytib qanday hujjatlar taqdim etish zarurligi haqida soʻradi. Tuman IIB boʻlimi boshligʻi tomonidan mazkur talabaga barcha zaruriy hujjatlar portfoliosi va imthonlar haqida ma’lumot berildi va viloyat IIBga uchrashish aytildi.
4-bosqich “Ekologiya va atrof muhit muhofazasi” yoʻnalishi bitiruvchisi tomonidan oʻz ta’lim yoʻnalishi bir nechta maktablarga ish soʻrab murojaat qilganida rad javobini olganini aytdi. Shunda tuman hokimi tomonidan oʻz turar joyiga yaqin maktablardan ish topib berish bildirildi.
4-bosqich “Ona tili va adabiyoti: oʻzbek tili” yoʻnalishi bitiruvchisi Shaxrizoda tomonidan ish topish jarayonida qiyinchiliklarga uchrab umidsizlikkka tushayotganini, koʻpchilik talabalar ham shu kabi toʻsiqlarga uchrayotganligi, tashkilotlar tomonidan "otangga bor, onangga bor" qabilida ish koʻrilayotganligi sababli amaliy yordam soʻradi. Bundan tashqari, repetitorlik faoliyatini amalga oshirayotganligini, lekin bu boʻyicha mehnat staji yozilmasligini bildirib, shu masalalarga yechim soʻradi. Bu savollarga javoban, tegishli soliq idorasidan oʻzini – oʻzi band qilish orqali mehnat stajiga ega boʻlish mumkinligini, bundan tashqari, tumanda vakant ish oʻrinlari koʻpligini, ma’lumotlarni tegishli saytlardan olishlari mumkinligi bildirildi.
Tadbir soʻngida bildirilgan taklifga asosan telegram messenjerida jondorlik talabalar guruhini ochishga va guruh moderatori qilib 4-bosqich “Ona tili va adabiyoti: oʻzbek tili” yoʻnalishi bitiruvchisi Shaxrizoda tayinlandi.
