Bugun Buxoro davlat universiteti faollar yig'ingohida O'zbekiston Respublikasi Fanlar akademiyasi Abu Rayhon Beruniy nomidagi Sharqshunoslik instituti yetakchi ilmiy xodimi, sharqshunos, manbashunos, tarix fanlari doktori Komiljon Rahimovning kitoblari va tarjima asarlari taqdimoti munosabati bilan ilmiy-ma'rifiy anjuman bo'lib o'tdi.
Ilmiy-ma'rifiy anjumanni Buxoro davlat universiteti rektori Obidjon Xamidov olim haqidagi fikrlari va samimiy dil so'zlari bilan ochib berdi. Buxoroning ardoqli farzandi, BuxDUning sobiq talabasi va bugungi kunda O'zbekistonni dunyoga, xususan, sharq mamlakatlariga o'z asarlari, izlanishlari orqali tanitayotgan olim faoliyati ibrat maktabi ekanligini e'tirof etib, tashakkur izhor etdi.
Anjumanda taniqli olim Komiljon Rahimovning ilmiy-ijodiy faoliyati, kitoblari, tarjima asarlarining mundarijasi, mazmun-mohiyati, xos xususiyatlari xususida professor-o'qituvchilarning hamda talabalarning ma'ruzalari, fikr-mulohazalari tinglandi.
"Olimning noyob tuhfalari", "Makorim-ul axloq" ziyosi", "Xojagon - naqshbandiya tariqati va yetti pir" kitobining ilmiy qiymati", "Komiljon Rahimov tadqiqotlarida tasavvuf davrlariga munosabat" kabi ma'ruzalar olim ijodini ochib berish va yaqindan tanishtirishga xizmat qildi.
Ilmiy-ma'rifiy anjuman mobaynida olim yig'ilganlarni qiziqtirgan barcha savollarga javob berdi. Ilm-u ma'rifatni yoyish uchun xizmat qilgan ushbu anjuman samimiy, ko'tarinki ruhda va chinakam ma'rifatga boy tarzda o'tdi.
