Bugun, Avstriyaning Krems amaliy fanlar universitetining bosh ijrochi direktori Karl Ensfelner, prezidenti Mag Boyer Xeyns Buxoro davlat universitetiga tashrif buyurdi. Mehmonlarni BuxDU rektori Obidjon Xamidov kutib olib, kichik majlislar zalida universitet faol talabalari hamda professor-o’qituvchilar ishtirokida ikki universitet oʻrtasida hamkorlik shartnomasini imzoladi.
Endilikda Buxoro davlat universiteti Krems amaliy fanlar universiteti bilan IMC-transmilliy dasturlarni ishlab chiqish va amalga oshirish, talabalar almashinuvini tashkil etish va amalga oshirish, hamkorlikdagi tadqiqot loyihalarini ishlab chiqish, ilmiy va pedagogik kadrlar almashinuvi, nashrlar va umumiy manfaatli boshqa materiallar almashinuvi bo’yicha hamkorlikni amalga oshiradi.
Shuningdek, tashrif doirasida mehmonlar Fransiyaning Vatel mehmonxona va turizm biznes oliygohi bilan tashkil etilgan qo’shma ta`lim dasturi faoliyati, Yapon markazi faoliyati bilan yaqindan tanishdilar. Uchrashuv so’ngida mehmonlarga estalik uchun sovg’alar topshirildi.
Maʼlumot oʻrnida aytish kerakki, IMC University Krems Avstriyadagi eng nufuzli oliy oʻquv yurtlaridan biri sanalib, 1994 yilda xususiy xalqaro biznes maktabi sifatida tashkil etilgan. 2002 yilda Avstriya hukumati tomonidan rasman Avstriya amaliy fanlar universiteti nomini olgan. Bitiruvchilarning ish bilan bandlik darajasi 98 foizni tashkil etadi. Universitetda 27 sohaga yoʻnaltirilgan 3 ta institut (biznes boshqaruvi, sogʻliqni saqlash va biotexnologiya) faoliyat olib boradi.
