Mamlakatimizda barcha sohalar qatori ta’lim tizimini rivojlantirishga ham alohida ahamiyat qaratilmoqda. Bu jarayonda ijtimoiy sohaning asosi o’laroq oliy ta'lim tizimidagi o'zgarishlarning salmoqli natijalari haqida to'lqinlanib so'zlamaslikning iloji yo'q. Mamlakatimizda so'nggi yillarda ta'lim tizimining barcha bosqichlarini zamonaviy talablar asosida tashkil etish bo'yicha amaliy ishlar hal qiluvchi bosqichga kirdi.
Prezidentimiz ta'kidlaganidek: “Farzandlarimiz maktabdan qanchalik bilimli bo'lib chiqsa, yuqori texnologiyalarga asoslangan iqtisodiyot tarmoqlari shuncha tez rivojlanadi, ko'plab ijtimoiy muammolarni yechish imkoni tug'iladi.” Darhaqiqat, ilmni qo’llab quvvatlagan va o’z farzandlarining ta’lim olishini shijoatlantirgan millatning kelajagi buyuk.
Ta’lim tizimini rivojlantirish borasida amalga oshirilayotgan islohotlari mamlakat siyosatida muhim ahamiyat kasb etib, oliy ta’lim muassasalari jumladan Buxoro davlat universitetida ham mazkur islohotlar izchil amalga oshirib kelinmoqda. Xususan, Buxoro davlat universitetida bugungi bozor iqtisodiyoti sharoitida murakkab raqobat kurashiga chidamli kadrlarni yetishtirish maqsadida ta’lim xizmatlari saviyasini oshirish, universitet pedagog xodimlari va izlanuvchilarining ilmiy salohiyatini oshirish bo’yicha qator amaliy ishlar amalga oshirilmoqda. 2021 yilning o’zida universitetning chet el OTMlari bilan hamkorlik shartnomalari va grant dasturlari doirasida 30 nafardan ortiq pedagog xodim va ilmiy tadqiqotchilar chet el xizmat safarida bo’lib, turli akademik faoliyat va ilmiy izlanishlarini olib borishdi. Joriy yilda esa bu ko’rsatkich o’tgan yilgiga qaragan o’sish xarakteriga ega bo’lib. xizmat safariga yuborilgan tadqiqotchilar qatoriga men ham kiritilgan edim va mening xizmat safarim Indoneziya respublikasiga uyushtirilgan edi. Universitetda tadqiqot olib borayotgan doktorant sifatida joriy yilning 18-noyabr sanasidan 4-dekabr kuniga qadar Indoneziya respublikasining bir nechta universitetlariga xizmat safarida bo‘ldim. Mazkur safar samarali va taasurotlarga boy bo‘ldi. Indoneziyaga uyushtirilgan xizmat safari dasturiga ko‘ra, birinchi navbatda Semarang shahridagi Diponegoro universiteti tomonidan tashkil qilingan “1-xalqaro yetakchi talabalar mitingi”da ishtirok etishim belgilangan edi.
Tadbirning asosiy maqsadi BMT miqyosida global muammo bo‘lib hisoblangan atrof muhit barqarorligi va inson resurslarining samarali taqsimlanishi, shuningdek turli xalqaro universitetlardan tashrif buyurgan talabalarning barqarorlik borasida tajriba almashishlarini ta’minlashdan iborat. Tadbir rejasida turli mamlakatlardan tashrif buyurgan OTMlar vakillari faol ishtirok etishi nazarda tutilgan bo‘lib, Diponegoro universiteti professor o‘qituvchilari va Indoneziya moliya vaziri ishtirokidagi ma’ruzalar tashkil qilindi. Mazkur tadbirning kun tartibiga kiritilgan mavzulari va ma’ruzalar “UI Greenmetric” xalqaro reytingi baholash tizimining 6 ta mezonlari: Setting & Infrastructure, Energy & Climate Change, Waste, Water, Transportation va Education & Research kabilarga asoslangan.
Tadbirning asosiy qismi sifatida Jepara shahrining Marine Science Texno Parkiga va Mangrove o‘rmoniga sayohat uyushtirdik. O‘rmon shahar ekotizimining barqarorligini ta’minlashga xizmat qilib, mehmonlar o‘z nomlaridan 2 dona Mangrove ko‘chatini o‘tqazishlari topshirig‘i berildi. Men ham universitet vakili sifatida BuxDU belgisi bilan ko‘chat o‘tqazdim (rasmda tasvirlangan). Diponegoro universiteti mezbonlik qilayotgan tadbir nihoyasiga yetgach, Jakarta shahridagi Gunadarma universitetiga tashrif buyurdim.
Gunadarma Universitetida “Curriculum benchmarking in Higher education Uzbekistan-Indonesia” mavzusida rasmiy uchrashuv tashkil qilinib, unda ilmiy loyihalar bilan ishlash, sun’iy intellekt, axborot texnologiyalari yo‘nalishida hamkorlik masalalarini takomillashtirish haqida so‘z yuritildi.
Mas’ullar bilan mavzu doirasida universitetning texnik salohiyatini ko‘rib chiqish, zamonaviy labaratoriya va IT jihozlari bilan yaqindan tanishib chiqish imkoniyatiga ham ega bo‘ldik. Ma’lum bo‘ldiki, bugungi kunda Gunadarma universitetida 3 ta super kompyuterlar mavjud bo‘lib, ular katta hajmdagi axborot bilan ishlash, shuningdek murakkab dasturlash amaliyotlarini bajarish uchun mo‘ljallangan kuchli parametrlik markaziy blokdan iborat.
Rejaga asosan, universitetning Turizm va shariat iqtisodiyoti mutaxassisliklari talabalariga dars soatlari tashkil qilindi. Xorijiy pedagog sifatida “regression equation and correlation analysis” va “Inflation” mavzularida ma’ruza o‘qib talabalar bilan savol javob mashg‘ulotlari, hayotiy iqtisodiy misollar va "keys stadi"lar uyushtirdik.
Tashrif doirasida, 30-noyabr kuni Indoneziyaning mashhur ta’lim muassasalaridan biri bo‘lib hisoblanadigan, xalqaro darajadagi reytinglarda top-300 talik ro‘yxatdan joy olgan Indoneziya Universitetiga (Universitas Indonesia) O‘zbekistonda iqlim o‘zgarishi va uning iqtisodiy va ijtimoiy oqibatlari mvzusida ma’ruza o‘tish uchun taklif qilindim. O‘zbekiston va O‘rta Osiyo mamlakatlarida sodir bo‘layotgan iqlimiy o‘zgarishlar haqida suhbat olib borildi va tinglovchilar bilan muhokamalar tashkil qilinib, ma’ruza mavzusi universitet ma’muriyati tomonidan sertifikatlar bilan rasmiylashtirildi.
https://www.topuniversities.com/universities/universitas-indonesia
Indoneziya universiteti Xalqaro Greenmetric loyihasining asos solingan OTM bo‘lib, Semarangdagi tadbirda ham tashkilotchi muassasa hisoblanadi. Kelgusida Buxoro davlat universiteti va Indoneziya universitetlari o‘rtasida hamkorlik o‘rnatilish, shuningdek, 2-xalqaro yetakchi talabalar mitingi Buxoro davlat universitetida o‘tqazilishi haqida suhbat olib borildi.
https://www.youtube.com/watch?v=dWmV_sRyfd4&t=4133s
Gunadarma universitetiga sayohatimizning so‘nggi kunlarida “INDONESIA - UZBEKISTAN CREATIVE ECONOMIC OUTLOOK 2023 (IUCEO 2023)” mavzusida konferensiya tashkil qilindi. Unga ko‘ra Indoneziya va O‘zbekiston turizm salohiyati, raqamli turizm va pandemiyadan keyingi davrda mamlakat iqtisodiyotining jadal o‘sish suratlari haqida o‘zaro suhbat olib borildi. Konferensiya xalqaro miqyosda olib borilib, Buxoro davlat universiteti rektori i.f.d., prof. O.X.Xamidov va Gunadarma universiteti rektori prof.Dr.E.S. Margianti, SE.,MM ham ishtirok etishdi.
Tashrifimiz nihoyasida mezbon universitetlar rektorlari va mas’ul bo‘limlarning rasmiy xodimlari ishtirokida yakuniy tadbirda universitetlarimiz o‘rtasida xalqaro aloqalarni rivojlantirish va kelgusida o‘zaro tashriflar va hamkorliklar ko‘lamini kengaytirish haqida so‘z yuritildi. Taqdirlash va minnatdorchilik marosimlarida dastur rejalarini muvaffaqiyatli amalga oshirgan va tadbirlarda faol ishtirok etgan universitet xodimlariga sertifikat va faxriy yorliqlar topshirildi.
~Feruz Yuldashev
