Buxoro davlat universiteti rektori Obidjon Xamidov tomonidan universitet faollar yig'ingohida 2-bosqich magistratura talabalari bilan uchrashuv o'tkazildi.
Uchrashuvda 700 nafardan ortiq magistrantlar, O‘zbekiston Respublikasi Prezidenti huzuridagi Davlat xizmatini rivojlantirish agentligi Buxoro viloyati filiali rahbari Zafar Jumayev, rektor maslahatchisi G‘ovsiddin Rabbimqulov, Ilmiy ishlar va innovatsiyalar bo'yicha prorektor To'lqin Rasulov, BuxDU Yoshlar masalalari va ma'naviy-ma'rifiy ishlar bo`yicha birinchi prorektori Azizbek Amonov, Korrupsiyaga qarshi kurashish “Komplaens nazorat” tizimini boshqarish bo`limi boshlig’i Yorqin Quliyev, BuxDU Magistratura bo'limi boshlig`i Akmal Turayevlar ishtirok etishdi.
– Joriy yilning “Insonga e’tibor va sifatli ta’lim yili” deya nomlanishi o`z oldimizga qo`ygan maqsadlarimizga muvofiq hodisa bo`ldi. Har bir yaratib berilayotgan sharoit bizdan va tolibi ilm bo`lgan sizdan yuksak mas’uliyat, g`ayrat talab etadi. Har bir mashaqqatimiz, muammomizning bosh sababi ta’lim tizimidagi kamchiliklar, yo`l qo`yayotgan xatolarimizdir. Shu yilning o`zida 560 nafar xotin-qizlarimizga davlat budjetidan 7 milliard so`m mablag`ning ta’lim olishlari uchun ajratilishi juda katta e’tibor namunasi emasmi?! Biz esa bunga qanday javob bera olyapmiz?! Bu borada har birimiz chuqur tafakkur qilmog`imiz, kuchimizni safarbar etib, o`qiyotgan sohamiz, muassasamiz, va eng muhimi, vijdonimiz oldida javob bera olmog`imiz lozim, - dedi BuxDU rektori Obidjon Xamidov so`zga chiqish asnosida.
– Ushbu muassasani ko`zdan kechirish asnosida bir jihatga alohida e’tibor berdim. Siz ta’lim olayotgan universitetda sizga yaratib berilgan shart-sharoit nainki Buxorodagi boshqa OTMlarda, balki respublikadagi ko`plab OTMlarda ham uchramaydi. Barchasi siz uchun maksimal qulaylik yaratish maqsadida qilinganini his etishingiz, buning shukronasi o`laroq, natija ko`rsatishingiz shart. Siz juda katta kuchsiz. Davlat xizmatlarida faoliyat yuritish uchun otlanar ekansiz, O`zbekiston kelajagining bunyodkori ekanligingizni amaliyotda ko`rsata olishingiz kerak. Biz shunchaki diplomli kadrni emas, o`z sohasining chinakam mutaxassisini saralab, yuzlab kadrlar ichidan tanlab olamiz, deya o`z fikr-mulohazalarini bildirdi O`zbekiston Respublikasi Prezidenti huzuridagi Davlat xizmatini rivojlantirish agentligi Buxoro viloyati filiali rahbari Zafar Jumayev.
Uchrashuvda bugungi kunda magistrlar uchun chet tillarini bilish muhimligi qayd etildi. Magistrantlar o‘z ilmiy-tadqiqot ishlari bo‘yicha xorijlik va respublikaning nufuzli olimlari bilan aloqalarni o‘rnatishlari, bu borada universitet rahbariyati doimiy qo‘llab-quvvatlashga tayyorligi bildirib o‘tildi.
