Shu kunlarda Janubiy Koreyaning Kyongju shahri meri boshchiligidagi delegatsiya mamlakatimizda mehmon bo‘lib turibdi. Taʼkidlash joizki, Kyongju shahri meri Nak Yong Ju ayni paytda Butunjahon merosi shaharlari tashkilotining Osiyo-Tinch okeani kotibiyati rahbari sifatida ham faoliyat ko‘rsatadi.
15-dekabr kuni Buxoro shahar hokimligida ushbu delegatsiya vakillari bilan uchrashuv bo‘lib o‘tdi. Uchrashuvda universitetimiz rektori Obidjon Xamidov va xalqaro hamkorlik bo‘yicha prorektor Abror Jo‘rayev ham ishtirok etishdi.
Uchrashuvda Buxoro va Kyonju shaharlari o‘rtasida do‘stona munosabatlarni mustahkamlash, tarixiy Buxoroning turizm salohiyatini Janubiy Koreyada targ‘ib qilish masalalari muhokama qilindi.
Rektor Obidjon Xamidov ham universitetimiz faoliyati haqida asosiy maʼlumotlarni berib o‘tib, hamkorlik yo‘nalishlari bo‘yicha takliflarni aytib o‘tdi. Uchrashuv oxirida Butunjahon merosi shaharlari tashkilotining Osiyo-Tinch okeani kotibiyati bilan hamkorlik memorandumi imzolandi.