Ayni paytda Ispaniyada xorij safarida bo‘lib turgan xalqaro hamkorlik bo‘yicha prorektor A.Jo‘rayev universitetimiz uchun manfaatli bo‘luvchi bir qator uchrashuvlarni o‘tkazmoqda. Xizmat safarining birinchi kunida A.Jo‘rayev Istambul shahrida Buxoro viloyatidagi birinchi issiqlik elektrostansiyasini qurib ishga tushirgan Turkiyaning Aksa Enerji vakili M.Arslon bilan uchrashdi. Uchrashuvda elektrostansiyaning xorijlik xodimlari uchun o‘zbek, ingliz va rus tili kurslarini tashkil etish, shuningdek talabalar uchun sayyor darslarni tashkil etishga kelishib olindi.
Safarning ikkinchi kunida Santyago de Kompostela universitetining Lugo shahridagi kampusida rasmiy uchrashuvlar o‘tkazildi. Uchrashuvda Lugo kampusi o‘quv ishlari bo‘yicha prorektori Fransisko Fraga, Boshqaruv va biznes menejmenti fakulteti dekani Roberto Bande hamda Muhandislik oliy maktabi agronomiya va o‘rmonchilik fakulteti professori Tomas Kuesta ishtirok etdi. Uchrashuvda o‘zaro hamkorlik masalalari muhokama qilindi va bir qator masalalarda kelishib olindi. Shu jumladan:
- Buxoro davlat universitetida olib borilayotgan ilmiy tadqiqotlar hamda professor-o‘qituvchilarning ilmiy ishlari to‘g‘risidagi maʼlumotlarni Santyago de Kompostela universitetiga yetkazish orqali o‘zaro ilmiy hamkorlikdagi yo‘nalishlarni belgilab olish mumkin bo‘ladi.
- SDKU doktoranturasiga qabul sentyabr va fevral oylarida tashkil etilib, unga jahonning istalgan joyidan nomzodlar ariza topshirishlari mumkin bo‘ladi. Doktoranturaga qabulda ariza topshiruvchining SDK universitetidan ilmiy rahbar bilan mavzuni oldindan muhokama qilinganligi muhim o‘rin tutib, Buxoro davlat universitetidan talabgorlar uchun rahbar tanlashda amaliy yordam ko‘rsatiladi.
- SDKU ilmiy laboratoriyalaridan BuxDU tadqiqotchilari o‘z amaliy ishlarini sinashda foydalanishlari mumkin. Buning uchun kafedralar o‘rtasida aniq hamkorlik rejasi ishlab chiqilishi zarur.
- BuxDU rektori O.Xamidov tomonidan imzolangan hamkorlik shartnomasi SDKU rektori tomonidan ham imzolanishi uchun taqdim etildi.
Uchrashuvda Samarqand shahrida bo‘lib o‘tayotgan Shanxay hamkorlik tashkilotining sammiti haqida ham fikr almashildi.
Xizmat safari davom etmoqda.
