So‘nggi yillarda O‘zbekiston Respublikasi bilan Isroil davlati o‘rtasidagi munosabatlar barcha sohalarda rivojlanib bormoqda. Xususan, oliy ta’lim, tibbiyot, farmasevtika, energetika, turizm, qayta tiklanuvchi energiya manbalari va boshqa ko‘plab yo‘nalishlarda loyihalar amalga oshirilmoqda.
Mamlakatimizda Isroil davlatining nufuzli Xolon texnologiya instituti va Ariyel universitetlari tomonidan shakllantirilgan delegatsiya mehmon bo‘lib turibdi. Professor-o‘qituvchi hamda olimlar qatorida tibbiyot, axborot texnologiyalari, muhandislik kabi sohalarning yuqori malakali mutaxassislari bo`lgan delegatsiya hamkorligida 5-11 sentyabr kunlari Toshkent, Samarqand va Buxoro shaharlarida “Birinchi O‘zbekiston-Isroil akademik forumi” o‘tkazilishi rejalashtirildi. Forum doirasida oliy ta’limning zamonaviy masalalari muhokamasi, “STEM (fan, texnologiya, muhandislik, matematika) fanlari konferensiyasi”, davra suhbatlari, tibbiyot, axborot texnologiyalari, muhandislik sohalari mutaxassislarining mahorat darslari ham o‘rin oldi.
Forumning ochilish marosimi 6 sentyabr kuni Buxoro davlat universitetida o‘tkazildi. Forum davomida isroillik hamkasblar bilan tanishish, fikr almashish va hamkorlik loyihalarini muhokama qilish imkoniyati bo`ldi.
TASHRIFNING IKKINCHI KUNI…
Buxoro shahrida oʻtkazilayotgan O'zbekiston-Isroil akademik forumi qizg'in kechdi. Buxoro davlat universitetida STEM xalqaro konferensiyasi doirasida xorijlik OTMlar ishtirokida muzokaralar olib borildi. Xususan, Ozarbayjonning Baku davlat universiteti rektori Elchin Babayev boshchiligida delegatsiya a’zolari ushbu universitetda 18 mingdan ortiq talabalar tahsil olishi, bugungi kunda universitetda Mexanika va matematika, Fizika, Jurnalistika, Huquq, Xalqaro munosabatlar va iqtisodiyot, Tabiiy fanlardan iborat fakultetlar mavjudligi haqida ma'lumot berdi hamda ushbu yo’nalishlarda ikki tomonlama hamkorlikni rivojlantirish maqsadida amalga oshirilishi mumkin bo’lgan vazifalar va rejalar haqida kelishib olindi. Uchrashuv davomida BuxDU va Baku davlat universiteti o’rtasida o’zaro almashinuv memorandumlari imzolandi.
BuxDU va Isroilning Holon texnologiyalar instituti bir necha yillar davomida hamkorlik olib bormoqda. “STEM – Birinchi Isroil – O’zbekiston akademik forumi”ning ikkinchi kunida Turizm sohasida bugungi kunda olib borilayotgan raqamlashtirish jarayonlari, mazkur sohada amalga oshirilayotgan yangiliklar, turizmning hozirgi zamonda katta roli va kelajak avlod uchun qanchalik foydali ekanligi haqida Holon texnologiyalar universiteti professorlari Rawet David, Cramsky Ehud, Schler Jonathan, Levy Tony Iqtisodiyot va turizm fakulteti professor-o’qituvchilari va talabalari ishtirokida seminar-trening olib bordi.
Isroildan tashrif buyurgan hamkor OTMlar qatorida Ariel universiteti vakillari, jumladan rektor Albert Pinhasov, Ariel universiteti prezidenti Yehuda Shoenfeld, Tabiiy fanlar fakulteti dekani Gary Gellerman, Strategik loyihalarni ishlab chiqish loyihasi direktori Dr. Nadia Iermakova boshchiligidagi delegatsiya BuxDU bilan hamkorlikni yo’lga qo’yish, muhandislik, tabiiy fanlar, tibbiyot va arxitektura yo’nalishlarida olib borilayotgan yangiliklar va ushbu sohalarda kelajakda hamkorlikni rivojlantirish bo’yicha hamkorlik shartnomasi imzolandi. Forum doirasida Ariel universiteti vakillari va Filologiya va Tarix fakulteti professor-o’qituvchilari va talabalari ishtirokida “21-asr Madaniy merosi” mavzusida uchrashuv tashkil qilindi. Davra suhbati professor Golda Akhiezer tomonidan ochib berildi va uchrashuv davomida madaniy merosning hozirgi yoshlar uchun ta’siri haqida muhokamalar bo’lib o’tdi.
TASHRIFNING UCHINCHI KUNI…
Ariel universiteti vakillari tomonidan O‘zbekistonda akademik yetakchilarning xalqaro sammiti “21-asrdagi ta’lim: Oldingi safda turib” mavzusida taqdimot olib borildi. Ariel universiteti rektori Albert Pinhasov Isroil ta’lim tizimi strukturasi, strategiyalari, gender tenglik va turli xildagi millatlar hamdo’stligini ta’minlashda ta’limning roli haqida nutq so’zladi.
Kunning ikkinchi qismida, BuxDU Axborot texnologiyalari fakulteti talabalari ishtirokida “Raqamli ta’lim” mavzusida Ariel universiteti professori Keren Barak tomonidan davra suhbati o’tkazildi. Jarayonda Buxoro viloyati OTM rektorlari ham bevosita ishtirok etib, mehmonlar bilan mavzuga oid fikrlar almashildi.
Talabalarning izlanishlarini yuzaga chiqarishda jonbozlik ko`rsatayotgan Buxoro davlat universitetida turli loyihalar, tanlovlar o`tkazilishi urfga aylangan. Tashrifning uchinchi kunida Isroilning Ariel universiteti bilan hamkorlikda talabalarning innovatsion loyihalari tanlovi bo‘lib o‘tdi. E’tiborli tomoni, Ariyel universiteti Buxoro davlat universiteti iqtidorli tadqiqotchi va talabalarining start-ap loyihalari g‘oliblarga mukofotlarni topshirish qatorida, ushbu loyihalarni amaliyotga joriy qilish bo‘yicha konsalting yordamini ham ko‘rsatdi.
Tanlovda universitetning iqtidorli talabalari o‘zlarining innovatsion g‘oya hamda ishlanmalari bilan ishtirok etishdi. Loyihalar tanlov komissiyasi tomonidan loyihaning innovatsionligi, kreativlik-ijodkorlik darajasi, loyihaga bo‘lgan talabning mavjudlik darajasi hamda amalga oshirish imkoniyatlari kabi mezonlari asosida baholandi. Tanlov komissiya xulosasiga asosan:
-Xorijiy tillar fakulteti talabasi Xadichabonu Olimovaning “Bigway” loyihasi 1-o‘ringa;
- Tabiiy fanlar fakulteti talabasi Ferangiz Aslonovaning “Sianur kislotaning mochevina va tiomochevina almashingan hosilalarining antipiren xossalarini tadbiq qilish” loyihasi 2-o‘ringa;
- Fizika-matematika fakulteti talabasi Muxiddin Nekboyevning “STEM yo‘nalishida Arduino bazasiga asoslangan DIY (do it yourself) konstruktorlarini yaratish hamda ularni o‘qitish metodikasini ishlab chiqish” loyihasi 3- o‘ringa munosib deb topildi.
Barcha ishtirokchilar sertifikat, esdalik sovg‘alar hamda universitet huzuridagi “Biznes akselerator”ga a’zolik guvohnomalari bilan taqdirlanishdi. Tavlov yakunida ishtirokchilarga loyihalarni amalga oshirish, amaliyotga joriy qilish, investorlarga taqdim qilish hamda Isroillik tengdoshlari bilan hamkorlikdagi loyihalarni amalga yuzasidan fikrlar almashildi.
