Haftaning muborak Juma kunida barchani sihat-salomatlikka, ruhiy tetiklanishga jalb etayotgan ziyorat velomarafoni bir necha oydirki, kengroq tus olib, ilgari faqat BuxDU professor-o`qituvchilari, xodimlari va talabalarini qamragan bo`lsa, bugungi kunda boshqa oliy ta’lim muassalari vakillarini ham bir nuqtaga biriktirdi.
– Biz, yoshlar o‘rtasida sog‘lom turmush tarzini targ‘ib qilish haqida ko‘p gapiramiz, – deydi BuxDU rektori Obidjon Hamidov. – Kuzatib borayotgan bo`lsangiz sportni ommalashtirishga bag`ishlangan ko‘plab tadbirlarni amalga oshiryapmiz. Ammo ko‘p hollarda katta avlod vakillari, ayniqsa, universitet olimlarining o‘zi qanchalik jismoniy harakatchan ekanligiga, ular o‘rtasida sportni ommalashtirishga ahamiyat qaratmaymiz. Anchadan beri an’anaviy tus olgan ziyorat velomarafoni ushbu niyatimizning amaliy ifodasi bo`lmoqda. Buxoroyi sharifning ruhimizni tetiklashtiradigan muazzam nuqtalarida bo`lib qaytish ishdan tashqari o`z tanamiz sog`ligimiz ustida qayg`urish uchun ayni muddao bo`lmoqda.
Ham ziyorat, ham velomarafonni qamrab olgan ushbu xayrli tadbir bugun yana-da quvonchli tus oldi. BuxDUning 3 nafar xodimi – Jismoniy madaniyat fakulteti dotsenti Fayziyev Yaxshi Ziyoyevich, Fizika-matematika fakulteti dotsenti Raxmatov Ilhom Ismatovich hamda katta o`qituvchisi Narzillayev Muxiddin Nasilloyevichlar ziyorat velomarafonida faol ishtirok etib kelayotgani uchun zamonaviy velosipedlar bilan taqdirlandi. BuxDU rektori Obidjon Xamidov samimiy tilaklarini bildirar ekan, barcha OTMlarni jalb etishga ulgurgan ushbu xayrli tashabbusni yana-da kengaytirishga da’vat etdi. Zero, sport inson o`zi uchun qila oladigan yaxshiliklarning eng yaxshi namunasidir.
