Viloyatimizning ilg`or tumanlaridan biri, sanoat sohasida yetakchi bo`lgan Kogon tumani hamda shahrining Buxoro davlat universiteti va Buxoro davlat tibbiyot institutida o`qiyotgan talaba-yoshlari uchun tuman va shahar hokimlari uchrashuvi bo`lib o`tdi. Uchrashuvda Buxoro viloyati hokimi Botir Zaripov tashrif buyurdi. Tashrif mobaynida BuxDU va BuxDTIning bakalavr hamda magistratura bosqichida o`qiyotgan kogonlik bitiruvchi talabalar hamda magistrantlar bilan uchrashdi.
Prezidentimiz Shavkat Mirziyoyev raisligida 15-iyun kuni aholini kasb-hunarga o‘qitish va monomarkazlar faoliyatini takomillashtirish chora-tadbirlari yuzasidan o‘tkazilgan videoselektor yig‘ilishida barcha hokimlar bitiruvchilar bilan shaxsan uchrashishi kerakligini ta’kidlagan edi. Bugungi uchrashuvda viloyat hokimi Botir Zaripov va hokimning tegishli o‘rinbosarlari, Kogon shahar va Kogon tumani hokimlari, ularning o‘rinbosarlari, oliygoh rektorlari, ish beruvchilar, korxona va tashkilotlar, mutasaddi idoralar rahbarlari ishtirok etishdi.
Muloqot davomida viloyat rahbari hamda Kogon tumani va shahri hokimlari mamlakatimizda keyingi yillarda yoshlarni qo‘llab-quvvatlash, ularning o‘z iqtidor va salohiyatlarini yuzaga chiqarishlari uchun keng imkoniyatlar yaratib berilayotganligi, Davlatimiz rahbarining tashabbusi bilan oliy o‘quv yurtlari moddiy-texnika bazasini mustahkamlash, ilmiy salohiyatini yuksaltirish, ta’lim sifatini xalqaro andozalar darajasiga ko‘tarish, iqtidorli yoshlarni qo‘llab-quvvatlash va rag‘batlantirish masalalariga alohida e’tibor qaratilayotganligi xususida atroflicha fikr-mulohazalarini bildirishdi. Viloyat rahbari bitiruvchilarni davlatimiz tomonidan yaratilayotgan imkoniyatlarni qadrlab, ulardan yanada samarali foydalanishga chaqirdi. Uchrashuv mobaynida kogonlik talabalar va magistrantlar o`z hududlariga borganda amalga oshirishni maqsad qilgan g`oyalari bilan o`rtoqlashishdi. Fikr-mulohazalarini eshitish barobarida ularni qiziqtirgan savollarga javob berildi. Joriy yilda 4-nafar namunali diplom bilan bitirgan talabalari shu joyning o`zidayoq ishga qabul qilindi.
Ochiq, samimiy tarzda o‘tgan muloqot davomida viloyat hokimi, tuman hamda shahar hokimlari bitiruvchi yoshlarni qiziqtirgan barcha savollarga batafsil javob qaytarishdi. Uchrashuv so‘ngida mutasaddilarga yosh mutaxassislarni tegishli tashkilotlarga ishga joylashtirish bo‘yicha vazifalar yuklatildi.
