22-aprel kuni “ELTUZ” telegram kanalida Buxoro Davlat Universitetida san’at haftaligi o‘tkazilgani, tanlovda qatnashgan talabalar ishlari doimgidek to‘g‘ri baholanmagani, mavzudan tashqari ishlarga yutuq berilgani iddao qilingan anonim xabar joylashtirilgan.
Aytib o`tish kerakki, ayni kunlarda bo`lib o`tayotgan “Yangi O`zbekistonda erkin va farovon yashaylik” shiori ostida viloyatda “Tasviriy va amaliy san’at festivali” doirasida mahorat darslari, uchrashuvlar, ko`rik-tanlovlar yuqori saviyada bo`lib o`tdi. Har bir tashkiliy va amaliy ish boshida O`zbekiston Badiiy Akademiyasi vakillari hamda O`zbekiston Badiiy ijodkorlar uyushmasi a’zolari mas’ul qilib belgilangan. “ELTUZ” telegram kanalida surishtirmay e’lon qilinganidek Buxoro davlat universitetining bu ishga umuman aloqasi yo`q. Buxoro davlat universiteti talabalari ko`p sonli qatnashuvchilar qatori ishtirokchi sifatida o`z ijodiy namunalarini taqdim etdi. Tashkiliy hamda baholash ishlarida BuxDUdan hech qanday vakil qatnashmagan. Qolaversa, Rasmlar chizish tanlovi anonim xabarda iddao qilinganidek, Buxoro davlat universitetida bo`lib o`tmagan. Tanlov Buxoro Tasviriy san’at muzeyida bo`lib o`tgan.
Anonim xabarda asossiz ravishda “tanlovda qatnashgan talabalar ishlari doimgidek to`g`ri baholanmadi” degan jumla bo`htondan o`zga narsa emas.
Buxoro davlat universiteti “ELTUZ” kanalida e’lon qilingan xabarni muassasa sha’ni va qadr-qimmatini kamsitishga, badnom qilishga qaratilgan harakat deb hisoblaydi. Amaldagi qonun hujjatlarida tuhmat qilgan shaxsga nisbatan ma’muriy va jinoiy javobgarlik belgilangan. Agar tuhmat qilish nashr qilish yoki boshqacha usulda ko‘paytirilgan matnda yoxud ommaviy axborot vositalari orqali amalga oshirilgan bo‘lsa, bu qilmishni va uning uchun javobgarlikni yanada og‘irlashtiradi.
