Qorli-qirovli kunlar ortda qoldi. Ko'ngillar ko'klam sururidan yayrar ekan, Buxoro davlat universiteti uzra Navro`z sayli boshlandi. Avval boshda doshqozonga bahorning shoh taomi Sumalak pishirish uchun o`tin yoqilarkan, sayl ishtirokchilariga eson-omon shu kunlarga yetkazgani shukronasi o`laroq bahoriy taomlardan iborat bayram dasturxoni yozildi. Ko`tarinki kayfiyatda, kuy-qo`shiq va raqslar hamohangligida o`tgan bayram saylida uzoq-yaqindan taklif qilingan mehmonlar qatorida BuxDU rahbariyati, professor-o`qituvchilari, xodimlari, talabalar ishtirok etishdi.
Bayramga xos bezalgan BuxDU keng maydoni barchani jamlar ekan, xalqimizning tarixi, madaniyati, urf-odat va an'analarini aks ettirgan ayvonlar, yo'lak bo'ylab talabalar tomonidan yaratilgan san’at asarlari ko`rgazmasi, milliy liboslarimiz, hunarmandchiligimiz o`zligimizni namoyon etadigan namunalar, sport o`yinlari, milliy xalq o`yinlari, talabalar teatr studiyalarining chiqishlari barobarida zakovat bilimdonlar bahsi o`tkazildi. Bir tomonda sumalakka yakun yasab, palovxonto`raga olov yoqildi. Dorbozlarning mahoratli ijrolari, foytunlar ishtiroki, milliy o‘yinlarimiz, lapar va ashulalar o‘zgacha fayz bag`ishladi. Ustozlar va talabalar milliy liboslarda xalq og`zaki ijodi namunalarini hamohanglikda kuyladilar, doiralar zarblandi, boqiy marosimlarimizdan parchalar ijro etib berildi. Har bir yo`nalish o`z qobiliyatini namoyish qilar ekan, Jurnalistika yo`nalishining ilk qaldirg`och talabalari ham o`z mahoratlarini ishga solib, Navro`z saylini jonli yoritib turdilar.
Navro`z saylini ranglarning jilosi aks etgan tasviriy san’at ishlanmalarisiz, qadriyatlar tarannumisiz, xalq o`yinlarisiz tasavvur etib bo’lmaydi. Buxoro davlat universitetining barcha fakultetlari tomonidan tashkillashtirilgan O`zbekistonimizning viloyatlari qadriyat va an’analarini aks etgan ko’rgazma, sport bahslari, xushovoz ijrochilarning musiqiy chiqishlari, kuy va raqslar jo`rligidagi sayl har yilgidan boshqacha o`tdi. Xalq tеrmalari, aytishuvlar, hazil – mutoyiba, qo`shiqlar, laparlar yangradi. Talabalarning qalamidan to`kilgan rangbaranglik, bahoriy taomlarning xilma-xilligi, dilbar raqslar barchaning ko’ngliga ko’tarinki ruh taqdim etdi.
Navro`z sayli davomida ilm-u ziyo maskani bo`lgan Buxoro davlat universitetida ilm masalasi har galgidek asosiy o`rin egalladi. Ma’naviy hordiq barobarida “Rektor kubogi” uchun qizg'in bahslarga boy navbatdagi "ZAKOVAT" intellektual o'yini ham bo`lib o`tdi. Ishtirokchilar soni 6 nafardan bo`lgan 11 ta jamoa o‘rtasida bo‘lib o‘tgan ushbu o‘yin munozara va bahslarga boy bo‘ldi.
Algoritm, Progress, Geosfera, Huquqshunoslar, Excellent, Stars, Intellegent, Everest, Evrika, Programmist, Liderlar jamoalari o‘yin so‘ngiga qadar o‘zlarining bilimlarini munosib namoyish etishdi.
“Zakovat” o‘yini bahslarining yakuniy natijasiga ko‘ra faxrli 3-o‘rin Xorijiy tillar fakultetining Algoritm, faxrli 2-o‘rin Pedagogika fakultetining Excellent jamoasiga nasib etdi. Mutlaq g‘oliblik bu safar ham Tarix va madaniy meros fakultetining “Huquqshunoslar” jamoasiga nasib etdi.
